İrəvan və Tehran hərəkətə keçdi – Azərbaycanlı prezident hərbi yük maşınlarını dayandıracaq?

İran və Ermənistan arasında silah tədarükü ilə bağlı məxfi müqavilə imzalandığına dair məlumatlar yayılıb. Müqavilə dəyərinin isə 500 milyon dollar olduğu iddia edilir.

“İran İnternational” razılaşmaya əsasən Tehranın İrəvanı kamikadze PUA-ları ilə təchiz etməsini nəzərdə tutduğunu yazıb. Ermənistan Müdafiə Nazirliyi iddiaları təkzib etsə də, sözügedən məlumat ictimaiyyətdə birmənalı qarşılanmayıb. Xüsusilə azərbaycanlı Məsud Pezeşkianın İranda hakimiyyətə gəlməsindən sonra Tehranın İrəvanla bağlı siyasətində müəyyən dəyişikliklərin olacağı gözlənilirdi.

M.Pezeşkian İranın Ermənistana gizli-aşkar silah satışını əngəlləmək gücünə sahibdirmi?

Globalinfo.az-a danışan politoloq Fərid Şəfiyev deyib ki, İran-Azərbaycan münasibətlərində köklü dəyişikliyin olacağı gözlənilmir:

“Mən bunun olacağına inanmıram. Yenə də İran Prezidenti Məsud Pezeşkianın nələrsə edəcəyi gözlənilir. Amma iki ölkə arasında fundamental problemlər var. Bunun əsas səbəbi Tehranın Bakıya yanaşmasıdır.

İranın son üç ildə Azərbaycana təzyiq siyasəti effekt vermədi. Bunu başa düşən Tehran münasibətləri normallaşdırmağa çalışır. O ki qaldı İranla Ermənistanın 500 milyon dollar dəyərində silah müqaviləsi imzalamasına, bu barədə əvvəllər də xəbər vardı. Bu məlumatların doğru olma ehtimalı var. Tərəflər iddiaları rəsmi olaraq qəbul etməsə də, belə bir müqavilə imzalanmış ola bilər”.

Hərbi ekspert Emin Həsənli Globalinfo.az-a açıqlamasında bəzi böyük dövlətlərin Ermənistana dəstək verməsinə rəğmən, müharibənin Azərbaycanın qələbəsi ilə sonlandığını qeyd edib:

“İran, Fransa, Hindistan kimi ölkələr Ermənistanı silahlandırır. Bu qüvvələr səylərinə baxmayaraq heç nəyə nail ola bilməyəcək. İrəvan bu silahlanma ilə odla oynayır. Sual yaranır ki, həmin silahlar kimə qarşıdır: Türkiyə, yoxsa Azərbaycan? 500 milyon dollar kifayət qədər böyük məbləğdir. Ermənistan iqtisadiyyatı belə bir alışın həyata keçirilməsinə imkan verəcək səviyyədə deyil. Mümkündür ki, bu silahları məhz Qərbin ayırdığı yardımlarla əldə etməyə çalışır.

Diqqətçəkən digər məqam isə bu silahları istifadə edəcək kadrların olmamasıdır. Yəni silahlanma həyata keçirilsə də, onu istifadə edəcək adam yoxdur. Görünür, Ermənistan 44 günlük müharibənin nəticəsini unudub. Proses davam edərsə, xatırlamalı olacaq”.