Putin buna ümid edirdi, lakin İran müharibəsi... - Timoçko

Rusiya Prezidenti Vladimir Putin ümid edirdi ki, Yaxın Şərqdəki müharibə ona heç olmasa, neftdən qazanc əldə etməyə kömək edəcək. Lakin ABŞ Prezidenti Donald Trampın təsəvvüründə “kral yalnız bir olmalıdır”, buna görə də Moskva faktiki olaraq İran müharibəsindən nə iqtisadi, nə də geosiyasi baxımdan faydalana bildi.
Axar.az xəbər verir ki, bu sözləri ukraynalı hərbi ekspert İvan Timoçko deyib.
“Putinin, yəqin ki, ümidləri var idi ki, o, vasitəçi kimi çıxış edə və İranla bağlı danışıqlarda üçüncü tərəfə çevrilə bilər. Putinin həmçinin neftdən pul qazanmaq ümidi var idi, amma burada çox “ammalar” var. İlk növbədə bu, bəlkə də paradoks deyil, Ukraynanın istifadə etdiyi fürsətdir. Yəni biz müasir döyüş taktikaları və strategiyaları, xüsusilə havada tətbiq edilən texnologiyalarımızı nümayiş etdirdik”, - o bildirib.
Timoçkonun sözlərinə görə, ikinci məqam ondan ibarətdir ki, Rusiya bu danışıqlarda üçüncü tərəfə çevrilə bilmədi:
“Çünki Ukraynada yaz-yay hücum kampaniyası uğursuz oldu. Yəni müharibənin beşinci ilində ciddi nəticə göstərə bilməmisənsə, necə ciddi vasitəçi ola bilərsən?
Daha bir az əhəmiyyətli məqam – “kral yalnız bir olmalıdır”. Bu, bir qədər ironik səslənsə də, Tramp heç kimin onunla bərabər səviyyədə çıxış etməsi ilə razılaşa bilməz. Yeri gəlmişkən, eyni səhv vaxtilə Putində də olub – o, Aleksandr Lukaşenkonu tərəfdaş yox, sadəcə öz iradəsini yerinə yetirən biri kimi görürdü. Bu da səbəblərdən biridir ki, Belarus ordusu Ukraynaya qarşı tam şəkildə cəlb olunmadı. Amma bu artıq başqa mövzudur”.