Jurnalistikanın ali prinsipləri UNUDULANDA - Qərəzlilk və məsuliyyətsizlik "GÖZ CIXARIR"...

Son günlər bəzi sosial media platformalarında və blog səhifələrində Salyan Rayon İcra Hakimiyyəti başçısının müavini Rəşad Cəbrayılov haqqında əsassız, böhtan və qərəz dolu məlumatların yayılması narahatlıq doğurmaya bilməz. Həmin məlumatların mötəbər mənbəyə əsaslanmadığı, peşəkar jurnalistika prinsiplərinə uyğun gəlmədiyi və sırf ictimai rəyə təsir etmək niyyəti daşıdığı açıq-aydın hiss olunur.

Bu tip yazıların heç bir jurnalistik araşdırmaya, faktlara və obyektiv təhlilə əsaslanmadığı ortadadır. Əslində isə medianın vəzifəsi cəmiyyəti düzgün məlumatlandırmaq, ictimai marağa xidmət etmək və insanları düşünməyə təşviq etməkdir. Təəssüf ki, bəzi “bloger” və ya media adı altında fəaliyyət göstərən şəxslər bu funksiyanı yerinə yetirmək əvəzinə şəxsi maraqlara və ya sifarişli hücumlara xidmət edirlər.

Burada bir məsələni açıq şəkildə vurğulamaq vacibdir: Rəşad Cəbrayılov ictimaiyyətin yaxından tanıdığı, uzun illər ərzində dövlətə, vətəndaşa ləyaqətlə xidmət etmiş, vicdanlı və məsuliyyətli bir məmurdur. Onun fəaliyyəti sadə vətəndaşdan tutmuş yüksək vəzifəli şəxslərə qədər hər kəs tərəfindən rəğbətlə qarşılanır. Bu gün bölgədə cəmiyyətin geniş kəsimi onun xidmətlərini təqdir edir və fəaliyyətinə yüksək qiymət verir.

Qərəzli və səviyyəsiz hücumlar sadəcə bir şəxsi deyil, ümumilikdə cəmiyyətin dövlətə olan inamını sarsıtmağa xidmət edir. Bu isə nə media azadlığı, nə də tənqid adı ilə əsaslandırıla bilməz. Tənqid məsuliyyət tələb edir. Əgər bir mətbuat orqanı və ya fərdi yazıçı hansısa məmur haqqında məlumat yayırsa, bu zaman ən azı obyektivlik, qarşı tərəfin mövqeyinə yer vermək, sübutlara söykənmək kimi əsas prinsipləri gözləməlidir.

Buradan açıq şəkildə bəyan edirik: Rəşad Cəbrayılov haqqında yayılan şər və böhtan xarakterli yazılar qətiyyən həqiqəti əks etdirmir və bu məlumatlar hüquqi məsuliyyət doğura bilər. Əgər bu cür məsuliyyətsiz yazılar davam edərsə, zəruri hüquqi tədbirlər görüləcək və bu cür halların qarşısı qanun çərçivəsində alınacaqdır.

Bu gün Azərbaycan dövlətçiliyinə, onun inkişafına sadiq, ictimai nüfuzu olan insanların hədəfə alınması heç də təsadüfi görünmür. Cəmiyyət isə artıq bu kimi yazıların sifarişlə yayımlandığını yaxşı anlayır. Cəfəngiyyatla dolu, faktlardan uzaq, qeyri-peşəkar yanaşma ilə hazırlanan yazılar sadəcə yazanların öz reputasiyasına zərbə vurur.

Rəşad Cəbrayılovun xidmətləri, şəxsi keyfiyyətləri və fəaliyyət yolu haqqında cəmiyyətin kifayət qədər məlumatı var. O, illərdir bölgədə peşəkar kadr kimi hörmət qazanıb və bu etimadı doğrultmağa davam edir. Cəmiyyətdə tanınan, etibarlı və nüfuzlu bir şəxsi əsassız şəkildə hədəfə almaq, iftira atmaq – təkcə əxlaqsızlıq deyil, eyni zamanda hüquqi baxımdan da məsuliyyətə səbəb ola biləcək bir davranışdır.

Azərinform.az olaraq bəyan edirik ki, biz əsassız iddialara qarşı həmişə fakt və hüququn tərəfində olmuşuq. Rəşad Cəbrayılov haqqında yayılan informasiyaların heç bir real əsası yoxdur və bu məlumatları qəti şəkildə təkzib edirik.

Hörmətli həmkarlar və media nümayəndələri – gəlin jurnalistikanın ali prinsiplərinə sadiq qalaq: Qərəzsizlik, obyektivlik və məsuliyyət.