Xətai rayon Polis İdarəsinin kollektivi həm qanunun keşikçisi, həm də sakinlərin etibarlı dayağıdır
1918-ci il iyulun 2-si tarixi Azərbaycan dövlətçiliyi və hüquqi sisteminin inkişafında mühüm bir mərhələ kimi yadda qalıb. Məhz bu tarixdə ilk dəfə Azərbaycan Xalq Cümhuriyyəti dövründə müstəqil polis orqanları yaradılıb və həmin gün bu gün də müasir Azərbaycan Respublikasında “Polis Günü” kimi qeyd olunur. Artıq 107 ildir ki, Azərbaycan polisi ölkəmizin sabitliyi, qanunçuluğu və vətəndaşların təhlükəsizliyi naminə fədakarcasına xidmət edir.
Azərbaycan polisi öz fəaliyyətini ölkə Konstitusiyası, “Polis haqqında” Qanun və digər normativ-hüquqi aktlar əsasında qurur. Onların əsas vəzifəsi ictimai asayişin qorunması, cinayətkarlığa qarşı mübarizə, vətəndaşların hüquq və azadlıqlarının təmin olunması, fövqəladə hallarda yardım göstərmək və cəmiyyətin təhlükəsizliyini təmin etməkdir. Bu vəzifələri yerinə yetirərkən polis əməkdaşları hər zaman yüksək peşəkarlıq, sədaqət və məsuliyyət nümayiş etdirirlər.
Xüsusilə də son illər ərzində Daxili İşlər Nazirliyi və onun rəhbərliyi altında aparılan islahatlar nəticəsində Azərbaycan polisi daha da modernləşib, texnoloji imkanlar artıb, vətəndaşlarla münasibətlərdə yeni yanaşmalar formalaşıb. Bütün bu dəyişikliklər polisin imicini cəmiyyətdə daha da gücləndirmiş, onun vətəndaşlarla birbaşa əlaqəsini sağlam təməllərə oturtmuşdur.
Azərbaycanın bütün bölgələrində olduğu kimi, Bakı şəhəri Xətai rayonunda da polis əməkdaşları öz peşə vəzifələrini ləyaqətlə və yüksək məsuliyyətlə yerinə yetirirlər. Xətai rayonu Polis İdarəsi illərdir ki, rayonda ictimai sabitliyin təmin olunmasında, hüquq pozuntularının qarşısının alınmasında və əhalinin təhlükəsizliyinin qorunmasında mühüm rol oynayır. Bu uğurların arxasında peşəkar rəhbərlik və öz işinə sadiq əməkdaşların fədakar əməyi dayanır.
Xüsusilə qeyd edilməlidir ki, Xətai Rayon Polis İdarəsinin rəisi, polis polkovniki Vaqif Müslümovun rəhbərliyi dövründə rayonda sabitlik və təhlükəsizlik sahəsində əhəmiyyətli irəliləyişlər qeydə alınıb. Onun rəhbərliyi ilə həyata keçirilən tədbirlər nəticəsində cinayətlərin sayı azalmış, əhalinin hüquqi maarifləndirilməsi gücləndirilmiş və polis-vətəndaş münasibətləri daha da sağlam zəmində qurulmuşdur. Bu gün Xətai rayon sakinləri öz polis orqanlarına güvənir, onlarla açıq dialoq və əməkdaşlıq münasibətləri qururlar.
Polis orqanlarının cəmiyyətə yaxınlığı, şəffaf fəaliyyəti və vətəndaşlara göstərilən humanist yanaşma son illərdə prioritet istiqamətlərdən birinə çevrilib. Xüsusilə pandemiya dövründə və təbii fəlakətlər zamanı polis əməkdaşlarının göstərdiyi misilsiz xidmətlər, onların yalnız hüquq-mühafizə yox, həm də sosial dəstək funksiyasını yerinə yetirdiyini sübut etdi. Bu da öz növbəsində polisin ictimai nüfuzunu daha da artırdı.
Uşaqların, qadınların və yaşlıların hüquqlarının müdafiəsi, məişət zorakılığına qarşı mübarizə, narkomaniyaya qarşı maarifləndirmə və digər sahələrdə görülən işlər, polisin humanist fəaliyyət spektrinin genişliyini göstərir. Bu yanaşma vətəndaşların polisə inamını daha da möhkəmləndirir, cəmiyyətlə hüquq-mühafizə orqanları arasında sarsılmaz bir körpü yaradır.
Azərbaycan Respublikası Prezidenti cənab İlham Əliyev dəfələrlə çıxışlarında Azərbaycan polisinin fəaliyyətini yüksək qiymətləndirmiş, onların Vətənə və xalqa sadiq xidmətini xüsusi qeyd etmişdir. Polis əməkdaşlarının xidmətləri dövlət tərəfindən mükafatlandırılır, müxtəlif orden və medallarla təltif olunur. Bu da göstərir ki, onların fədakar əməyi nə dövlət, nə də cəmiyyət tərəfindən diqqətdən kənarda qalmır.İnanırıq ki, polisimizin səyləri ilə ölkəmizdə təhlükəsizlik və ictimai nizam daha da möhkəmlənəcək, vətəndaşlarımız öz evində, küçəsində və iş yerində rahat, təhlükəsiz həyat sürəcəklər. Bu müqəddəs peşənin sahibləri kimi polis əməkdaşlarımız hər zaman Vətənə, xalqa və qanuna sədaqətlə xidmət edəcəklər.
