Azərbaycan nümayəndə heyəti “İDEX-2017” beynəlxalq müdafiə sənayesi sərgisi çərçivəsində bir sıra görüşlər keçirib

Əbu-Dabidə keçirilən beynəlxalq konfransda və “İDEX-2017” müdafiə sənayesi sərgisində Azərbaycanı fövqəladə hallar naziri Kəmaləddin Heydərov, Dövlət Sərhəd Xidmətinin rəisi Elçin Quliyev, müdafiə sənayesi nazirinin müşaviri Azad Məmmədov və Daxili İşlər Nazirliyinin baş maddi-texniki təchizat idarəsinin rəisi Elçin Həsənovun daxil olduğu nümayəndə heyəti təmsil edir.
AZƏRTAC-ın məlumatına əsasən, ölkəmizin rəsmi nümayəndə heyəti sərgi çərçivəsində BƏƏ-nin vitse-prezidenti, baş nazir və Dubay hakimi şeyx Məhəmməd bin-Rəşid əl-Məktum, Türkiyə Silahlı Qüvvələri Baş Qərargahının rəisi Hulusi Akar və Dubay Əmirliyi polisinin nümayəndələri ilə görüşlər keçirib.
Qeyd edilib ki, Azərbaycan Prezidenti İlham Əliyevin təşəbbüsü ilə 2009-cu ildən bəri ölkəmizin müdafiə sənayesi məhsulları bütün nüfuzlu beynəlxalq müdafiə sərgilərində nümayiş etdirilir. 2017-ci ildə keçirilən silah sərgisində Azərbaycanın iştirak etməsinin məqsədi müdafiə təyinatlı məhsullar istehsalı sahəsində dünyanın aparıcı şirkətləri ilə tərəfdaşlıq münasibətləri yaratmaq və yerli istehsalda texnoloji yeniliklərin tətbiqini təmin etməkdir.
Sərgidə dünyanın 57 ölkəsindən 1235 şirkət iştirak edir. Onlar müdafiə təyinatlı perspektivli texnologiyaları, sistemləri və avadanlıqları təqdim edəcəklər.
İDEX – silahların və təhlükəsizlik texnologiyalarının nümayiş etdirildiyi ən nüfuzlu beynəlxalq sərgilərdən biridir. Bu sərgi silah və hərbi texnika istehsalçılarının və sifarişçilərinin diqqətini daim cəlb edir.