Sabitlik və təhlükəsizlik olmadan inkişaf mümkün deyil
Regionun iqtisadi inkişafı, investisiya mühiti və sahibkarlığın genişlənməsi hər şeydən əvvəl sabitlik və təhlükəsizlik tələb edir. Biz iş adamları üçün ən mühüm amil məhz budur – sabitlik, hüququn aliliyi və təhlükəsiz mühit. Təəssüf ki, son günlər Azərbaycanın ayrılmaz tərkib hissəsi olan Naxçıvan Muxtar Respublikası ərazisinə qarşı pilotsuz uçuş aparatları ilə həyata keçirilmiş hücum regionda bu sabitliyə ciddi zərbə vurmuş hadisə kimi yadda qaldı.
İran istiqamətindən həyata keçirildiyi bildirilən bu hücum təkcə hərbi və siyasi baxımdan deyil, həm də iqtisadi və regional inkişaf baxımından son dərəcə təhlükəli presedentdir. Çünki mülki infrastruktura qarşı yönəlmiş hər hansı təhdid ilk növbədə insanların təhlükəsizlik hissini sarsıdır, bu isə iqtisadi fəaliyyətə və investisiya mühitinə birbaşa təsir göstərir.
İqtisadiyyatın inkişafı üçün sabitlik əsas şərtdir. Biz sahibkarlar yaxşı bilirik ki, investisiya qoyuluşu üçün ilk növbədə təhlükəsiz mühit lazımdır. Müasir dünyada iqtisadi inkişaf yalnız zavodlar, müəssisələr və ticarət əlaqələri ilə ölçülmür. Bunun üçün güclü dövlət, sabit siyasi mühit və təhlükəsiz coğrafiya da vacibdir.
Bu baxımdan Naxçıvan kimi strateji regionun təhlükəsizliyi yalnız hərbi və siyasi məsələ deyil, həm də iqtisadi məsələdir. Çünki Naxçıvan həm logistika baxımından, həm də regional əməkdaşlıq baxımından mühüm əhəmiyyət daşıyır.
Məhz buna görə də mülki infrastruktura – xüsusilə də Naxçıvan Beynəlxalq Hava Limanı kimi mühüm nəqliyyat qovşaqlarına qarşı hücumlar regionun iqtisadi həyatına da təhlükə yaradır.
Baş vermiş hadisə ilə bağlı Azərbaycan dövlətinin mövqeyi qəti və prinsipialdır. Azərbaycan Respublikasının Prezidenti İlham Əliyev Təhlükəsizlik Şurasının iclasında bu hücumu Azərbaycanın ərazisinə qarşı törədilmiş terror aktı kimi qiymətləndirərək məsələ ilə bağlı sərt mövqe ortaya qoydu.
Dövlət başçısı vurğuladı ki, pilotsuz uçuş aparatlarının zərbələri mülki obyektləri hədəfə alıb və bu, beynəlxalq hüququn norma və prinsiplərinin kobud şəkildə pozulmasıdır.
Bir iş adamı olaraq hesab edirəm ki, dövlətimizin bu prinsipial mövqeyi son dərəcə vacibdir. Çünki suverenliyə və təhlükəsizliyə qarşı yönəlmiş hər hansı təhdidə qarşı qəti mövqe nümayiş etdirilməlidir. Güclü dövlət və güclü təhlükəsizlik sistemi olmadan iqtisadi inkişafdan danışmaq mümkün deyil.
Azərbaycan hər zaman regionda əməkdaşlıq və qarşılıqlı hörmət prinsipinə əsaslanan siyasət yürüdüb. Ölkəmiz heç vaxt qonşu dövlətlərə qarşı təhdid siyasəti aparmayıb. Əksinə, Azərbaycan regionda iqtisadi əməkdaşlıq layihələrinin təşəbbüskarı kimi çıxış edib və sabitliyin qorunmasına töhfə verib.
Bu baxımdan Naxçıvana qarşı həyata keçirilmiş hücum xüsusilə təəssüf doğurur. Çünki belə hadisələr regionda etimad mühitinə zərbə vurur və əməkdaşlıq imkanlarını zəiflədir.
İqtisadiyyat isə etimad üzərində qurulan sistemdir. Etimadın zədələnməsi investisiyalara, biznes əlaqələrinə və regional layihələrə də mənfi təsir göstərir.
Azərbaycan bu gün regionun ən güclü iqtisadiyyatlarından birinə malikdir. Son illər ölkəmizdə həyata keçirilən islahatlar, biznes mühitinin yaxşılaşdırılması və infrastruktur layihələri iqtisadi inkişaf üçün möhkəm zəmin yaradıb.
Bu inkişafın əsas dayağı isə güclü dövlətçilik və milli təhlükəsizlik sistemidir. Dövlətimizin qətiyyətli mövqeyi bir daha göstərir ki, Azərbaycanın suverenliyinə və ərazi bütövlüyünə qarşı yönəlmiş hər hansı addım cavabsız qalmayacaq.
Bir iş adamı kimi mən əminəm ki, Azərbaycan dövləti ölkəmizin təhlükəsizliyini təmin etmək və vətəndaşlarımızın hüquqlarını qorumaq üçün bütün zəruri addımları atacaq.
Regionda sabitlik yalnız dövlətlərin deyil, həm də biznes dairələrinin, sahibkarların və sadə insanların marağındadır. Çünki sabitlik olmadan nə iqtisadi inkişaf mümkündür, nə də sosial rifah.
Naxçıvana edilən dron hücumu bir daha göstərdi ki, regionda sülhün və təhlükəsizliyin qorunması hər bir dövlətin məsuliyyətidir. Dövlətlərin suverenliyinə hörmət və beynəlxalq hüququn prinsiplərinə əməl olunması bu sabitliyin əsas şərtidir.
Azərbaycan isə bu prinsiplərə sadiq qalaraq həm təhlükəsizliyi, həm də iqtisadi inkişafı qorumaq əzmindədir.
Biz sahibkarlar da dövlətimizin yanında olaraq sabitliyin və inkişafın qorunmasına öz töhfəmizi verməyə davam edəcəyik.
