İqtidara təhdidlər artır: Prezidentin çıxışındakı “rəngli inqilab” mesajının şok gizlinləri

Mayın 26-da “Buta” sarayında Azərbaycan Respublikasının milli bayramı – Respublika Günü münasibətilə rəsmi qəbul keçirilib

Tədbirdə prezident İlham Əliyev maraqlı mesajlar verib. Bu ismarışlar beynəlxalq dairələrə yönəlik idi.

Dövlət başçısı Azərbaycana xaricdən təhdidlər olduğuna diqqət çəkib. Eyni zamanda ABŞ-a bir jest edərək Rusiya ilə olan gərginliyin olduğuna işarə vurub.

Ölkədə hazırkı ictimai-siyasi vəziyyətə toxunaraq, prezident qeyd edib ki, ölkə daxilində risklər yoxdur - risklər xaricdən qaynaqlanır.

“Biz ölkəni xarici təhlükələrdən qorumalıyıq”, - prezident bildirib və əlavə edib ki, Azərbaycan yalnız öz milli maraqlarından hərəkət edir və xarici siyasətdə heç bir avantüraya getməyəcək.

“Dünyada bizə hörmət edirlər və əməkdaşlığa can atırlar. Azərbaycanın heç bir ölkə ilə problemi yoxdur, Ermənistan istisna olmaqla”, - İlham Əliyev deyib.

Beynəlxalq siyasət haqda danışan İlham Əliyev ABŞ prezidenti Donald Trampın Səudiyyə Ərəbistanına səfərini yüksək qiymətləndirib. “Tramp dedi ki, başqa ölkələrin daxili işlərinə qarışmayacaq.

Axı Azərbaycan təbliğat hücumu ilə üzləşən ölkələrdən biri idi. İndi Donald Trampın hakimiyyətə gəlişindən sonra biz artıq görürük ki, başqa ölkələrin daxili işlərinə qarışmaq tendensiyası azalmağa başlayır”, - prezident bildirib.

Ulus.Azi yazır ki, İ.Əliyev Trampdan danışarkən ABŞ-ın rəngli inqilablar, ərəb baharı kimi çevriliş layihələrini maliyyələşdirməsinə eyham vurmaq istəyib.

Vaxtilə Azərbaycanda da Qərbin maliyyəsi ilə hakimiyyət çevrilişləri planları qurulub və zamanında bu xain planlar pozulub.

Trampın siyasətində bu çalarların olmadığını söyləyən Əliyev demək istəyib ki, təhlükə Rusiya və başqa xarici dairələrdən gəlir. Prezident xarici təhdidlərin olduğunu istisna etməyib.

“Rəngli inqilablar”dan söhbət açmazdan öncə ABŞ-ın beyini və dünyada baş verən bütün “rəngli inqilablar”da əli olan dahi politoloq Cin Şarp barədə danışmaq məqsədəuyğun olar.

Unutmaq lazım deyil ki, Qərbin həyata keçirdiyi inqilab ssenarilərində daim qeyri-qanuni silahlı dəstələrdən də xaos yaratmaq və dağıdıcılıq üçün aktiv istifadə olunur.

Buna misal olaraq Liviya və Misirdə baş verən inqilablarda yerli xalq adı ilə qarşıdurma yaradanları, Suriyada “Azad Suriya Ordusu” adı altında terror əsdirənləri, sonradan İraq hökumətini təhdid edən İŞİD-çiləri göstərmək olar.

Hansı ki, həmin terror qruplarının Qərbin nəzarəti altında olduğuna artıq heç bir şübhə yeri qalmayıb. Bu silahlı dəstələrin sırasında Azərbaycan vətəndaşlarının varlığı, onların ölkəmizdə də real təhlükə mənbəyi olmasının göstəricisidir. Azərbaycan hökuməti özü də hadisələri dəqiq və dərindən analiz edir.

(AZƏRİNFORM)