Ermənistanın yeni hücumu VƏ YA gec-tez Rusiya çökəcək

Qərbin Azərbaycanı dəstəkləməsinin vaxtı çatıb

Ümumrusiya Azərbaycan Konqresinin (ÜAK) qeydiyyatının ləğv edilməsində erməni diasporunun əli var.

İstiPress-ə bu barədə məlumat verən politoloq Tofiq Abbasov bununla bağlı müəyyən məlumatlara malik olduğunu bildirib:
“Erməni diaspor təşkilatları Rusiya hüquq-mühafizə qurumlarına müraciət edərək, Ümumrusiya Azərbaycan Konqresinin casusluqla məşğul olduğunu iddia etmişdilər. Amma onda Rusiya kəşfiyyatı araşdırma apararaq bu iddiaların yanlış olduğunu bildirmişdilər. Amma indi belə görünür ki, erməni diasporu ÜAK-ın fəaliyyətini dolayısı ilə dayandırıb”.

Rusiya Federasiyası dünən Ali Məhkəməsi ÜAK-ın qeydiyyatının ləğv edilməsi barədə Rusiya Ədliyyə Nazirliyinin iddiasını təmin edib. Ədliyyə Nazirliyi ÜAK-ın fəaliyyətində Rusiya Federasiyasının qanunvericiliyinin pozulduğunu iddia edir, ÜAK-ın Mərkəzi Şurasının Rəyasət Heyətinə aşkar olunan pozuntuların aradan qaldırılması ilə bağlı dəfələrlə xəbərdarlıq edildiyini bildirir. Bütün bu iddiaların nəticəsində, Nazirlik təşkilatın ləğvinə dair inzibati iddia qaldırılması üçün bu il martın 9-da Ali Məhkəməyə müraciət edib.

Tofiq Abbasovun fikrincə, Rusiya Ədliyyə Nazirliyi bu məsələdə tələskənliyə yol verib: “Ola bilər ki, təşkilatın sənədlərində müəyyən nöqsanlar var, hesabat vaxtında verilməyib və s. Amma nəzərə alınmalı idi ki, ÜAK-ın prezidenti Fazil Qurbanov təzə, yəni bir neçə aydır bu vəzifəyə seçilib. Yəni təşkilatı qaydaya salmaq üçün ona vaxt verməli idilər”.

Azərbaycanın əməkdar elm xadimi, Milli Elmlər Akademiyasının akademik Fazil Qurbanov bu vəzifəyə yəni 2016-cı ilin dekabrında seçilib. O, tibb elmləri doktoru, Rusiya Xalqlar Dostluğu Universitetinin professorudur. Tanınmış iş adamı, mərhum Aydın Qurbanovun qardaşıdır. 2001-ci ildə Ümumrusiya Azərbaycan Konqresi yaradılarkən Aydın Qurbanovun xüsusi xidmətləri olub. Fazil Qurbanovdan əvvəl 2001-ci ildə ÜAK sədri akademik Məmmədbağır Əliyev olub.
Təbii ki, ÜAK-ın qeydiyyatının ləğvi rəsmi Bakının etirazına səbəb olub. Milli Məclisinin bu gün keçirilən iclasında çıxış edən YAP icra katibinin müavini, İctimai birliklər və dini qurumlar komitəsinin sədri Siyavuş Novruzov Rusiyada bildirib ki, bununla Azərbaycan-Rusiya münasibətlərinə zərbə vurulub:

“Bu nə deməkdir axı? Rusiya bütün işlərini başa çatdırıb, bircə qalmışdı Ümumrusiya Azərbaycan Konqresi? Azərbaycanda çoxlu sayda rus baxçaları, məktəbləri və mərkəzləri var. Mən İctimai birliklər və dini qurumlar komitəsinin sədri kimi Azərbaycanın müvafiq orqanlarına rəsmi müraciət edəcəyəm ki, Rusiyanın buradakı mərkəzləri, rus icmalarının sənədlərinin qaydasında olub-olmaması ilə bağlı hesabat hazırlayıb təqdim etsinlər”.

Azərbaycanın keçmiş dövlət müşaviri, politoloq Qabil Hüseynli isə İstiPress-ə müsahibəsində Ümumrusiya Azərbaycan Konqresinin qeydiyyatının ləğv edilməsini Rusiyanın Azərbaycana təzyiqi kimi dəyərləndirib:


“Əslində bu, Rusiyanın Azərbaycana təzyiqi xeyli əvvəl başlayıb. Məsələn, Ermənistan və Rusiya qoşunları birləşdirildi və ona rəhbər erməni qoyuldu, Ermənistana “İsgəndər” raketləri verildi və s. Kiçik bir zaman ərzində Rusiya Ermənistana 3 milyard dollarlıq silah verib. Bu da növbəti təzyiq vasitəsidir”.

Qabil Hüseynlinin fikrincə, Rusiya bu addımı ilə Qarabağ münaqişəsində Ermənistanın tərəfini tutur: “Buna görə, Rusiya ATƏT-in Minsk qrupunun həmsədrliyindən çıxarılmalıdır. Çünki artıq münaqişə tərəfinə çevrilib. Həm də Azərbaycan qərb yönümlü siyasəti gücləndirməlidir. Bu, Rusiyanın ermənipərəst siyasətinə adekvat cavab ola bilər”.

Lakin politoloqun fikrincə, Azərbaycan Qarabağda açıq müharibəyə getməməlidir: “Müharibə olarsa, Rusiya Ermənistanı açıq dəstəkləyəcək. Bu, təhlükəli ola bilər. Rusiyanın çökəcəyi günü gözləmək lazımdır. Gec-tez Rusiya çökəcək. Buna paralel şəkildə Qərbin Gürcüstanı dəstəklədiyi kimi Azərbaycanı da dəstəkləməsi vacibdir”.