Ermənilərin boğazında qalan "yəhudi buterbrodu" - VİDEO

Albert Aqarunovun şəhadətindən 25 il keçir

Aqarunov sağ olsaydı, bəlkə də... Şuşanın işğalından 25 il ötür. Və biz hələ də bəlkələrin təlatümündən çıxa bilmirik. Amma faktlar da faktlığında qalır - Şuşanın işğalına qədər Azərbaycan Ordusunda "ağır artilleriya" sayılan döyüşçülərin itkisi baş verməsəydi, bu gün hər şey başqa cür də ola bilərdi. Ermənilərin başına külli miqdarda pul qoyduğu əfsanəvi Albert Aqarunov kimilərini nəzərdə tuturam. Erməni kabusuna çevrilən Aqarunovun öldürülməsi düşmən tərəfinin bəlkə də Şuşanın işğalı planı ilə paralellik təşkil edirdi. Cəsarətli manevrləri ilə qarşı tərəfə sarsıdıcı zərbə vuran məhz Aqarunov idi. Erməni zirehli texnikası bir-birinə yaxınlaşandan sonra bir top mərmisi ilə iki texnikanı məhv edən də o idi. Şuşaya hücum edilən vaxt, 9 tank, 7 BMP və bir çox texnikanı məhv etmişdi.

Hərbçi dostları ona "yəhudi buterbrodu" adını vermişdilər. Mürəkkəb idarəetməyə malik "T-2" tanklarını gözüyumulu idarə edən Albert doğrudan da məğlubedilməz idi. Onu tankında məğlub etmək mümkünsüz idi və elə bu səbəbdən də Alberti tankından kənarda vurdular. Sonuncu döyüşü 8 may 1992-cu ildə Şuşa uğrunda oldu. O gün Azərbaycan tərəfi çox sayda yaralı və şəhid verir. Albert mövqeyini dəyişərkən öz tankının düz önündə qalmış şəhid əsgər yoldaşlarının meyitini kənara çəkmək üçün hərbi maşından çıxır. Əvvəlcə tankı düzgün istiqamətə yönəltməsi üçün mexanikinə göstəriş verir. Daha sonra öldürülmüş şəhidlərə tərəf qaçır və meyitləri kənara çəkən zaman erməni snayperinin gülləsinə tuş gəlir.

Əminəm ki, döyüş yoldaşları onun haqqında maraqlı xatirələrə malikdir. Bizim isə xatirimizdə o, tankın içində Mirşahinin "Yəhudiləri Azərbaycan torpağını qorumağa nə vadar edir?" sualına verdiyi "Mən bu torpaqda yaşayıram, doğulmuşam burda, yaşayıram burda, daha heç nə məcbur eləmir" - sərrast cavabıyla qalıb. Bir də dillər əzbəri olan qəhrəmanlığı ilə.

Şuşanın itkisi ilə birgə Albertin şəhadətini də bu gün rəhmətlə anırıq. Milli qəhrəmanımız, milli qürurumuz, onsuz da cənnəti bu dünyada qazanmışdın. Odur ki, "qanın yerdə qalmasın" deyirik...!

P.S Şuşanın işğalı nəticəsində şəhərdə 195 nəfər Azərbaycan vətəndaşı xüsusi amansızlıqla qətlə yetirilmiş, 165 nəfər yaralanmış, onlardan 150 nəfəri əlil olmuş, 552 körpə valideynlərini itirmiş, 20 mindən artıq əhali isə doğma yuvasını tərk edərək məcburi köçkün vəziyyətinə düşmüşdür. Əsir və girov götürülmüş 58 azərbaycanlının taleyi barədə bu günə qədər məlumat yoxdur.