Türk dövlətlərinin bu qərarı təəssüfləndirici haldır - İşçi Qrupun sədri

siyaset

21:10 10.04.2025 413

Qazaxıstan, Türkmənistan və Özbəkistanın Kiprin yunan tərəfi ilə diplomatik münasibətləri gücləndirməsi son günlər ən çox müzakirə olunan məsələlərdəndir. 3 ölkənin Kiprdə səfirlik açması birmənalı qarşılanmayıb.

Prezident İlham Əliyev də Bakıda ötən gün keçirilən konfrans zamanı Şimali Kipr məsələsinə toxunub. Prezident deyib ki, Azərbaycan Şimali Kipr Türk Respublikasının Türk Dövlətləri Təşkilatında müşahidəçi statusu almasında fəal rol oynayıb.

“Biz bu məsələni fəal şəkildə müdafiə edən ölkələrdənik. Prezident Tatar təşkilatın Şuşa şəhərində qeyri-rəsmi Zirvə toplantısına dəvət olundu və orada iştirak etdi. Şimali Kiprin bayrağı da orada dalğalanırdı”, – dövlət başçısı qeyd edib.

Dövlətimizin başçısı əlavə edib ki, Azərbaycanın siyasəti hər zaman aydın olub: “Biz hər zaman qardaşlarımızın yanındayıq. Bizim siyasətimiz hər zaman aydın olub. Bizim bu sahədə hər hansı başqa gündəliyimiz yoxdur. Biz yalnız qardaşlarımıza necə kömək edə biləcəyimiz haqda düşünürük ki, onlar öz dövlətlərini qoruyub saxlaya bilsinlər. Onlar buna tarix və əməlləri baxımından layiqdirlər”.

Şimali Kipr Türk Respublikasının Prezidenti Ersin Tatar İlham Əliyevin səsləndirdiyi bəyanatı məmnuniyyətlə qarşıladığını bildirib.
“Azərbaycan ilə aramızdakı könül birliyinin, ortaq dəyərlərin və eyni millətin ayrılmaz bir parçası olaraq münasibətlərimizin daha da inkişaf etməsi bizi sevindirir.

Prezident İlham Əliyevə bu bəyanatına görə bir daha təşəkkür edir, qardaşlıq və əməkdaşlığımızın əbədi olmasını diləyirəm”,-o deyib.

Modern.az-a açıqlamasında Azərbaycan-Şimali Kipr Türk Respublikası Parlamentlərarası İşçi Qrupunun sədri Cavanşir Feyziyev bildirib ki, Mərkəzi Asiya türk dövlətlərinin yunan Kiprində səfirlik açmaları təəssüfləndirici haldır:

“Şimali Kipr Türk Cümhuriyyətinin bugünkü statusu tanınmayan respublikadır. Azərbaycan Şimali Kipr Türk Respublikasının Türk Dövlətləri Təşkilatına müşahidəçi üzvlüyünə təşəşbbüs göstərib və bu qəbul edilib. Şimali Kipr Türk Respublikası hazırda Türk Dövlətləri Təşkilatının müşahidəçi üzvü kimi təşkilatın bütün tədbirlərində iştirak edir. Buna baxmayaraq Mərkəzi Asiya türk dövlətləri Cənubi Kiprdə öz səfirliklərini açdılar. Bu çox təəssüfləndirici haldır. Məhz bu, onun göstəricisidir ki, bu günə qədər hələ də müstəqil türk dövlətlərinin vahid siyasi platformadan çıxış etmələrinə nail ola bilməmişik. Olduqca təəssüfləndirici haldır. Şimali Kipr türkləri dünya türklərinin ayrılmaz hissəsi, onun bir seqmentidir. Onların müstəqillik hüququna etiraz olunduğu halda dünya türklüyü Şimali Kipr türklərinin maraqlarını qorumağa borcludur”.

Deputat vurğulayıb ki, Azərbaycan dövləti Şimali Kiprli türk qardaşlarının arxasındadır:

“Türkiyə Şimali Kipr türklərinin maraqlarını qorumaq istiqamətindəki fəaliyyətini uzun on illiklər ərzində davam etdirir. Əslində, Şimali Kipr Türk Respublikasının qarantı rolunda çıxış edir. Azərbaycan da Şimali Kiprlə siyasi, iqtisadi, mədəni, humanitar əlaqələrini genişləndirməklə, onun Türk Dövlətləri Təşkilatına müşahidəçi üzv kimi qəbul olunmasında aparıcı rol oynayıb. Dünən ADA Universitetində Prezidenti İlham Əliyevin iştirakı ilə “Yeni dünya nizamına doğru” mövzusunda beynəlxalq forum keçirilib. Forumda bu məsələ ilə bağlı verilən suala cavabında cənab Prezident şəkildə bildirdi ki, Azərbaycan birmənalı olaraq Şimali Kipr türklərinin maraqlarının qorunmasında fəal iştirak edir. Ölkəmizin başçısı vurğuladı ki, Azərbaycan dövləti Şimali Kiprli türk qardaşlarımızın arxasındadır”.

Azerinform.az

Oxşar xəbərlər