Şərurlu İsfəndiyarın NƏVƏSİ YOL GÖSTƏRDİ: "Get binadan özünü at..." – "Jasmine Park"da NƏ BAŞ VERİR...
olke
12:46
28.01.2026
23
Yardımlı sakinləri MTK rəhbərliyindən şikayətçidir – minlərlə manatlıq yatırım, dəyişdirilən qıfıllar və iddia olunan hədələr
Yardımlı rayon sakinləri Mirhəsən Əlizadə Asif oğlu və qardaşı Mirməhəmməd Əlizadə Asif oğlu redaksiyamıza müraciət edərək “Şərur” MTK ilə yaşadıqları ciddi problemlər barədə şikayət ediblər.
Şikayətçilərin bildirdiyinə görə, onlar 2023-cü ilin may ayında “Şərur” MTK-ya məxsus tikinti sahəsində – Yeni Yasamal, Jasmin Park yaşayış kompleksində şirkətin tarsovka (bəzək-suvarma-təmir) işlərini görməyə başlayıblar. İlkin mərhələdə yalnız usta kimi fəaliyyət göstərdiklərini deyən vətəndaşlar, təxminən bir il sonra həmin ərazidə şirkətdən icarəyə boş obyekt götürüblər. “144 kvadratlıq obyekt götürdük, razılaşma şifahi oldu”Mirhəsən Əlizadənin sözlərinə görə, dönərxana–kafe açmaq məqsədilə 144 kvadratmetr, təmirsiz boş sahə icarəyə götürülüb:“Razılaşmaya əsasən, aylıq icarə haqqı 1 kvadratmetrə 10 manat olmaqla 1440 manat müəyyən edildi. Həmçinin bu məbləğin şirkətin tarsovka işləri üzrə bizə olan ödənişləri hesabına bağlanması barədə razılaşdıq.”Şikayətçilər bildirir ki, elektrik və kommunal xərcləri isə nağd şəkildə ödəməli olublar. Lakin yaşayış kompleksinin tam hazır olmaması və müştəri azlığı səbəbindən bu ödənişlərdə gecikmələr yaranıb və nəticədə şirkətə təxminən 4000 manat borc formalaşıb.
“Ödəniş etdik, amma qəbul edilmədi”
Vətəndaşlar bildirir ki, onlara bir neçə dəfə möhlət verilib və bu müddətdə 500 manat, sonra əlavə 200 manat, daha sonra isə istifadə etmədikləri avadanlıqları sataraq 650 manat ödəniş ediblər. Lakin buna baxmayaraq, şirkət rəhbərliyi tərəfindən ödənişlərin qəbul edilmədiyi iddia olunur.Onların sözlərinə görə, sonradan icarə haqqı da nağd şəkildə hesablanaraq, işıq pulu daxil olmaqla ümumi borcun 24 min manat olduğu bildirilib.
“200 min manatdan çox yatırım etdik, amma əmlakımıza buraxılmırıq”
Şikayətçilər iddia edirlər ki, obyektə öz şəxsi vəsaitləri hesabına 200 min manatdan artıq yatırım ediblər. Buna baxmayaraq, şirkət rəhbərliyi təmir xərclərini 10 200 manat kimi hesablayıb, üzərinə 7000 manat tarsovka pulu əlavə edərək onların hələ də borclu qaldığını bildirib.Mirhəsən Elizadənin sözlərinə görə:
“Qıfılları dəyişiblər, içəri buraxmırlar. Daşınar əmlakımızın hamısını özününküləri kimi təqdim edirlər. Dəfələrlə danışığa getmişik, amma ‘əlindən nə gəlirsə et’ cavabı almışıq.”
İddia olunan hədə və zor tətbiqi
Şikayət məktubunda xüsusilə ciddi bir iddia da yer alır. Mirhəsən Əlizadə bildirir ki, məsələni mediada işıqlandıracağını dedikdən sonra şirkət rəhbəri İsfəndiyar Axundovun nəvəsi Azər tərəfindən ona qarşı kinayəli və təhqiramiz ifadələr işlədilib:“Dedi ki, istəsən sənə daha yaxşı yol göstərim – get binadan özünü at aşağı, mənim üçün problem yoxdur.”Şikayətçi həmçinin obyektindəki əmlakın çəkilişinə belə icazə verilmədiyini, zor tətbiq edilərək ərazidən uzaqlaşdırıldığını və bir daha ora buraxılmayacağı bildirildiyini deyir.
Qeyd olunur ki, bu iddialarla bağlı video və səs yazıları mövcuddur və aidiyyəti qurumlara təqdim ediləcək.
Redaksiyadan qeyd
BİA.az olaraq qarşı tərəfin də mövqeyini dərc etməyə hazırıq. Mövzunu diqqətdə saxlayacaq, aidiyyəti qurumların münasibətini oxuculara təqdim edəcəyik.
BİA.az
Oxşar xəbərlər
XƏBƏR LENTİ
© 2014-2023 Azerinform.az
Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.