Rusiyada hər il 200 min insan bu səbəbdən ölür - Şok faktlar

Rusiya Dövlət Dumasının İdman Komitəsinin sədr müavini Amir Xamitov baş nazir Mixail Mişustinə son hesabat ili üçün spirt tərkibi 35% -dən çox olan alkoqoldan ölənlərin sayının statistikasını göstərmək təklifi ilə müraciət göndərib.

Axar.az Publika.az-a istinadla xəbər verir ki, siyasətçi statistikanın ictimaiyyətə açıq olan rəsmi məlumatlara əsaslanacağını bildirib.
Xamitov hesab edir ki, bu, etiketin profilaktik funksiyasını gücləndirəcək və həm də alkoqol istehlakının azaldılması üzrə hərtərəfli dövlət strategiyasının bir hissəsi olacaq. Dövlət Dumasının deputatı Ümumdünya Səhiyyə Təşkilatının (ÜST) məlumatlarına istinad edərək, Rusiyada hər il təxminən 200 min insanın alkoqol qəbulu ilə bağlı səbəblərdən dünyasını dəyişdiyini və onların demək olar ki, üçdə birinin əmək qabiliyyətli yaşda olan kişilər olduğunu qeyd edib.

Onun sözlərinə görə, spirtli içkilərin satışı məntəqələrinin sıxlığı tibbi xidmətin sıxlığından xeyli yüksək olan kənd və monoşəhərlərdə ölüm statistikası xüsusilə narahatedicidir.

Xamitov bildirib ki, alkoqoldan sui-istifadə problemi Rusiyada ən kəskin problemlərdən biri olaraq qalır:

“Hər il təxminən 200 000 rusiyalı alkoqol istehlakının nəticələrindən ölür - bunlar sadəcə quru statistika deyil, gənclər və əmək qabiliyyətli insanlar da daxil olmaqla real həyatdır. Buna görə də mən bu təşəbbüslə çıxış edirəm ki, güclü alkoqolun etiketlərində ölüm statistikası göstərilsin - məsələn, araq və tərkibində 35%-dən çox spirt olan digər içkilərdə".

Xamitov əlavə edib ki, belə bir tədbir ciddi xərc tələb etmir, lakin profilaktikada mühüm rol oynaya bilər və insanlar həqiqəti bilməli və həddindən artıq spirtli içki qəbulunun nələrə səbəb ola biləcəyini başa düşməlidirlər.