Genişmiqyaslı mübarizə başlayır: Qüvvələr bölünür, iki cəbhə olacaq

“Mövcud geosiyasi proseslər onu göstərir ki, yeni dünya düzənində Avropa, demokratiyanın son adası olaraq qalacaq”.

Globalinfo.az xəbər verir ki, bu sözləri politoloq Azər Qasımov deyib.

O, Avropanın böyük mübarizəyə hazırlaşdığını bildirib:

“ABŞ Prezidenti Donald Trampın atdığı addımlar, Rusiyanın yanında olması və bundan sonra edəcəkləri dünyanı bir neçə güc mərkəzinə bölsə də, bu, demokratiya ilə diktaturanın qarşıdurması şəklində iki cəbhədə davam edəcək. Avropa öz dəyərlərinin müdafiəsi üçün bütün dünyanı qarşısına almağa hazır görünür. Təbii ki, digər regionlardan da Avropanın yanında duracaq ölkələr olacaq.

Avropanın demokratiya mübarizəsini Ukraynada verəcəyi aydındır. Demokratiya anlayışı prosesin gedişində ya tarixə qovuşacaq, ya da yeni dünyanın simvoluna çevriləcək. Çünki demokratiya var olma mübarizəsini dünyada ilk dəfə olaraq müharibə yolu ilə əldə edəcək”.

Azər Qasımov

Politoloq qeyd edib ki, tarixdə demokratiya uğrunda hansısa ölkələrdə qarşıdurmalar olub, amma indiki kimi geniş miqyaslı mübarizə müşahidə edilməyib:

“Demokratiya özünün ölüm-qalım mübarizəsinə başlayır. Avropanın bu qarşıdurmadan üzüağ çıxmaqdan başqa yolu yoxdur. Əks halda regionda ideologiya boşluğu yaranacaq. Avropa xalqlarının öz cəmiyyətlərinə olan inamı qırılacaq. Bu da bölgə daxilində indi də mövcud olan daha böyük çatlara səbəb olacaq. Avropanın iri dövlətləri öz başlarının halına qalacaq və birlik dağılacaq. Hesab edirəm ki, bu mübarizə Avropa üçün böyük sınaq olacaq”.

Turan Rzayev
Globalinfo.az