Keçmiş şöhrətini yenidən bərpa edən təhsil ocağı...

Yevlax rayonunun Xaldan kənd kompleks tam orta məktəbi həmişə Azərbaycanın sayılıb-seçilən təhsil müəssisələrindən biri olub. SSRİ dövründə İttifaq miqyasında tanınıb. 1904-cü ildə əsası qoyulan tədris ocağı 1975-ci ildən kompleks məktəb kimi fəaliyyət göstərməyə başlayıb. 1986-cı ildə “kompleks məktəb” statusunu alıb.

“Kompleks məktəb” dedikdə o başa düşülür ki, yəni təhsil müəssisəsinin tərkibində həm də uşaq bağçası, tədris-istehsalat kombinatı və musiqi məktəbi fəaliyyət göstərir.

Xaldan məktəbi həm yüksək nəticələr göstərən şagirdləri, məzunları ilə, həm də təsərrüfatda uğurları ilə nəinki SSRİ də, hətta xarici ölkələrdə də tanınıb.


Məktəbin müvəffəqiyyəti xeyli müddət rəhbəri olmuş Zahid Şöyübovun adı ilə bağlıdır. 40 il Xaldan məktəbinin direktoru işləmiş “Şöhrət” ordenli Zahid müəllim Xaldan məktəbinin timsalında, necə deyərlər, bir brend yaradıb. 1981-ci ildə Umummilli Lider Heydər Əliyev Yevlax rayonunda səfərdə olanda Xaldan məktəbinə də baş çəkib, Zahid Şöyübovla görüşüb.

Zahid müəllimdən sonra məktəb baxımsız qalıb, bərbad hala düşüb. Keçmiş şöhrətindən əsər-əlamət qalmayıb. Heç kim vəziyyəti düzəltməyə cəhd etməyib.

Mən təhsillə bağlı, konkret olaraq Yevlaxda təhsilin vəziyyəti ilə bağlı tənqidi məqalələr yazmışam. Elə Xaldan məktəbi barədə də yazmışdım. Lakin bu yaxınlarda Yevlaxda olarkən Xaldana gedib məktəbdəki indiki abu-havanı görüb çox sevindim. Sanki məktəbə ikinci nəfəs gəlib.

2019-cu ildən Xaldan məktəbinə direktor təyin olunmuş gənc mütəxəssis Günel Yusifzadə az müddətdə rəhbərlik etdiyi məktəbi dirçəltməyi bacarıb, qabaqcıl təhsil müəssisəsinə çevirib. Məhz onun fəaliyyəti nəticəsində məktəbə diqqət artıb və 2021-ci ildə məktəb kompleksi əsaslı şəkildə təmir olunub.


İndi keçmişdəki ənənələr daha yaxşı, innovativ formada davam etdirilir. Təhsildə və təsərrüfatda uğurlar göz qabağındadır. Günel xanım söz verdiyi kimi məktəbin nüfuzunu, tarixi irsini qoruyub saxlamaq üçün yorulmadan çalışır, kollektivi də buna səfərbər edə bilir.

Qısa vaxtda məktəbdə təmir işləri aparılıb, yaşıllıq zolaqları salınıb,limon və nar bağları yenidən salınıb.Həmçinin, məktəb stadionu bərpa edilib, 960 şagird yerlik məktəb binası müasir inventar və avadanlıqlarla tam təmin edilib.
Məktəbin geniş ərazisi və təsərrüfat sahələri şagirdlərin təcrübə keçməsi üçün çox əlverişlidir. Bu şəraitdən səmərəli istifadə olunur, güllər əkilir, tinglər yetişdirilir. Qrant layihələri çərçivəsində meyvə-tərəvəz əkini daha da artırılıb. Müxtəlif ekoloji tədbirlər də keçirilir. Peşə təmayüllü sinif şagirdlərinin yetişdirdikləri məhsullar rayondakı uşaq bağçalarına, məkttəblərinə də göndərilir.


Xaldan məktəbinin uğurlarından danışmaqla, yazmaqla bitməz. Gedib görmək lazımdır. Əsl nümunəvi məktəb, nümunəvi təsərrüfat subyektidir. Təcrübə qazanmaq üçün başqa məktəblərdən oraya ekskursiya təşkil etmək də olar. Bu inkişafa nail olduğu üçün direktor Günel Yusifzadəyə, rəhbərlik etdiyi müəllim-şagird heyətinə afərin.

Sima Babayeva