Ağsaqqallar Şurası bəyanat yaydı: "Eldar Quliyev barədə iddialar böhtandır"

Teleqraf xəbər verir ki, bu fikirlər Azərbaycan Ağsaqqallar Şurasının yaydığı bəyanatda əksini tapıb.

Bəyantda deyilir: "Medianın üz qarası sayılan belə “informasiya saytlarında” tanınmış ictimai-siyasi xadimlər, ayrı-ayrı vətəndaşlar və sahibkarlar haqqında, eləcə də müxtəlif idarə və təşkilatlarla bağlı böhtan xarakterli məlumatları yayaraq cəmiyyətdə həmin şəxslər, qurumlar barəsində yanlış təsəvvür yaradır, onların nüfuzuna xələl gətirir, bu şər kampaniyasının dayandırılması müqabilində bəzi tələblər irəli sürürlər. Təəssüf hissi qeyd etmək istəyirik ki, son zamanlarda bu cür “informasiya saytlarının” növbəti “hədəflərindən” biri də Azərbaycan Ağsaqqallar Şurası olub. Bu qərəzli saytlar çirkin niyyətlərini həyata keçirməkdən ötrü Azərbaycan Ağsaqqallar Şurasının sədri, millət vəkili, professor Eldar Quliyevlə bağlı reallıqla heç bir əlaqəsi olmayan, uydurma iddialar irəli sürərək bildirirlər ki, guya o, özünə məxsus olan binanı Şuraya icarəyə verib. Bir sözlə, xəstə təxəyyüllərini işə salaraq ağla gəlməyən iftiralar, ağ yalan iddialar, saxta fikirlər ortaya atır, Eldar Quliyevin haqqında şər-böhtan yayaraq nüfuzuna xələl gətirir və bu yalan informasiya yayımında müəyyən məqsədlər güdürlər".

Vurğulanıb ki, insanları çaşdırmaq üçün yayılan bu yalan informasiya yalnız Eldar Quliyevə qarşı deyil, onun sədrlik etdiyi Azərbaycan Ağsaqqallar Şurasının 35 mindən çox üzvünə qarşı da böhtan xarakterli məlumatlar kimi cəmiyyətimizdə, eləcə də sıralarında tanınmış ictimai-siyasi, elm və mədəniyyət xadimlərinin, nüfuzlu ağsaqqalların olduğu təşkilatın üzvlərində ciddi narahatlıq doğurur:

"Bildirmək istəyirik ki, Azərbaycan Ağsaqqallar Şurasının yerləşdiyi bina, daha doğrusu binadakı qeyri-yaşayış sahəsi müqavilə əsasında fiziki şəxsdən icarəyə götürülmüş, orada zəruri təmir işləri aparılmış və lazımi texniki avadanlıqlarla təchiz edilərək Şuranın fəaliyyəti üçün normal şərait yaradılmışdır. Bu qeyri-yaşayış sahəsini icarəyə verən şəxsin Eldar Quliyevlə heç bir bağlılığı, əlaqəsi yoxdur. Həmin şəxsin sahibkarlıq, eləcə də vətəndaş hüquqlarının qorunması və kimliyinin ictimailəşdirilməməsi baxımından adının açıqlanmasını düzgün hesab etmirik. Lakin maraqlananlar Azərbaycan Ağsaqqallar Şurasına müraciət edərək, yaxud da 09 dekabr 2021-ci il tarixli 3M-3056 reyestr nömrəli icarə müqaviləsini araşdıraraq həmin şəxs haqqında məlumat ala bilərlər.

Biz məsələnin məğzini, mahiyyətini araşdırmadan, heç bir real fakta istinad etmədən, “şər dəyirmanına su tökərək” yalan informasiya yaymağa, kimlərisə günahlandırmağa, “mühakimə” etməyə, işgüzar nüfuzunu zədələməyə çalışanlara qarşı məhkəməyə, müvafiq hüquq-mühafizə orqanlarına müraciət edərək qanun çərçivəsində sərt tədbirlərin həyata keçirilməsini təmin edə bilərik. Lakin Azərbaycan Ağsaqqallar Şurası olaraq biz qərəzli media subyektlərinə bir daha ciddi şəkildə xəbərdarlıq edərək onları qınayır, şər-böhtan kampaniyası aparmaqdan, yalan informaiya yaymaqdan çəkinməyə çağırır, ədalətli, vicdanlı və dürüst olmağa dəvət edirik".