Putin üçün həssas məqam: Kiyev paradı vuracaq?

Hər kəsə bəllidir ki, Putinin 8 maydan 10 maya qədər elan etdiyi üç günlük atəşkəsin əsas səbəbi 9 May paradının təhlükəsizliyini təmin etməkdir. Bu parad vasitəsilə Putin dünyaya göstərmək istəyir ki, Rusiya hələ də geosiyasi qütbdür və artıq beynəlxalq izolyasiyadan çıxıb.

Axar.az xəbər verir ki, bunu politoloq Kamran Cəfərli deyib.

“Lakin burada çox vacib bir məqam var: təhlükəsizlik. Əgər xarici ölkə liderlərinin iştirak etdiyi bu tədbirdə hər hansı təxribat, diversiya və ya hərbi zərbə baş verərsə, bu, Rusiyanın imicini bərpa etmə cəhdini nəinki sıfıra endirəcək, hətta mənfi istiqamətə yönəldəcək. Belə olan halda, "9 May Paradı" adlı siyasi reklam aksiyasının keçirilməməsi, keçirilməsindən daha məqsədəuyğun olardı. Axı adi bir paraddakı təhlükəsizliyi təmin edə bilməyən ölkə nəinki geosiyasi, heç regional qütb statusuna iddia edə bilməz”, - politoloq bildirib.

Onun sözlərinə görə, Ukraynanın hərbi-siyasi rəhbərliyi bu tarixi məqamın və onun Rusiya üçün nə qədər həssas olduğunun fərqindədir:
“Fürsətdən istifadə edən Prezident Zelenski isə çox incə və peşəkar diplomatik mesaj verdi:

"Biz Rusiya Federasiyası ərazisində baş verənlərə görə məsuliyyət daşıya bilmərik. Buna görə də sizə heç bir təhlükəsizlik zəmanəti verə bilmərik".
Diplomatik baxımdan olduqca məharətlə verilmiş bir bəyanatdır. Axı, Ukrayna necə başqa bir dövlətin ərazisində keçirilən tədbirin təhlükəsizliyinə zəmanət verə bilər? Bununla belə, hər kəs yaxşı anlayır ki, Zelenski əslində hansı mesajı vermək istədi.

Prezident Ofisinin rəhbəri Yermak isə dünən aşağıdakı şəkli paylaşdı. Bu mesajlarla Ukraynanın hərbi-siyasi rəhbərliyi 9 May paradında iştirak etmək istəyən liderləri yenidən düşünməyə çağırır.