Bağırsaq xərçənginin geniş yayılmasının SƏBƏBİ

Gənclər arasında bağırsaq xərçəngi hallarının artması bakteriya toksinlərinin təsiri ilə əlaqəli ola bilər.

Modern.az xəbər verir ki, bu barədə “Nature” dərgisində elmi məqalə dərc olunub.

Aparılan araşdırma bəzi bağırsaq çubuğu (Escherichia coli) ştamlarının ifraz etdiyi kolibaktin adlı maddəyə diqqət çəkir. Alimlərin fikrincə, məhz kolibaktin xəstəliyin inkişafına səbəb olan ilkin mutasiyalara yol aça bilər.

Beynəlxalq tədqiqatçılar qrupu 11 ölkədən olan təxminən 1000 xəstənin şiş toxuması nümunələrini təhlil edib. 50 yaşdan aşağı pasiyentlərin yarıdan çoxunda kolibaktinin DNT-yə zədələyici təsirinə xas mutasiyalar aşkar edilib.

Mütəxəssislər hesab edirlər ki, yoluxma halları adətən uşaqlıqda, 10 yaşına qədər baş verir, lakin nəticələri yalnız onilliklər sonra üzə çıxır.

Kolibaktinlə əlaqəli mutasiyalar 40 yaşdan əvvəl xərçəng diaqnozu qoyulmuş şəxslərdə 70 yaşdan yuxarı xəstələrlə müqayisədə 3,3 dəfə daha çox qeydə alınıb. Yaşlı pasiyentlərdə isə DNT zədələrinin xarakteri daha çox təbii qocalma prosesləri ilə bağlı olub.