Baş redaktorun atası həbs edildi

Jurnalist Ramin Məhəmmədoğlu:"Tənqidi fikir daşıyıcılarının yaxın qohumlarının qanunsuz həbs olunması ölkəmizin demokratik imicinə xələl gətirən rəzalətdir"

Ağcabədi rayon Məhkəməsi dünən Sonolay.org informasiya agentliyinin baş redaktoru Ramin Qurbanovun atası Məhəmməd Qurbanovu CM-nin 182-ci maddəsi (Hədə-qorxu ilə tələb etmə) ilə təqsirli sayaraq onun üç il müddətinə həbsinə qərar verib. Bu barədə məlumat verən jurnalist məhkəmə hökmünün qanunsuz olduğunu deyib: "Zərərçəkmiş kimi tanınan Maliyyə Nazirliyinin 10 saylı Regional Maliyyə Müfəttişliyinin rəisi Ədalət Nəbiyev məhkəmədə Məhəmməd Qurbanovun ondan hədə-qorxu ilə heç nə tələb etmədiyini bildirib. Nəbiyev deyib ki, Məhəmməd Qurbanovun hədə-qorxu ilə rüşvət tələb etdiyini Ağcabədi rayon Təhsil Şöbəsinin vəzifədən qovulmuş müdiri Mehdi Əhmədovdan eşitmişdir".
Ramin Məhəmmədoğlu xatırladıb ki, 2016-cı ilin mart – aprel aylarında 10 saylı Regional Maliyyə İdarəsi tərəfindən Ağcabədi rayon məktəblərində aparılan yoxlamalar zamanı Ağcabədi məktəblərində ciddi şəkildə maliyyə mənimsəmələri faktı aşkar edilmişdir: "Lakin təftiş komissiyası hər vəchlə üzləşdiyi korrupsiya hüquqpozmalarını ört-basdır etməyə çalışmışdır. “Sonolay.org” saytı həmin korrupsiya hüquqpozmalarını media müstəvisinə çıxarmaqla ictimailəşdirdikdən sonra baş prokurorluq Ağcabədi məktəblərində aparılan maliyyə yoxlamalarını nəzarətə götürərək nəticədə 897 min manat dövlət vəsaitinin mənimsənilməsi faktını üzə çıxarmış, cinayət işi açmışdır. Əlbəttə, Mehdi Əhmədov özü dövlətə zərər vurduğundan, onun zərərçəkmiş qismində tanınması gülünc olardı. Ona görə də maliyyə cinayətinin ört-basdır edilməsinə mane olmuş KİV rəhbərindən qisas almaq sifarişini yerinə yetirən məhkəmə Ədalət Nəbiyevi zərərçəkmiş qismində tanımağı məqsədəuyğun saymışdır".
R. Məhəmmədoğlu bildirib ki, məhkəmə qərarının qanunsuzluğunu sübuta yetirmək və ixtiyar yaşlı atasının həbsdən qurtulması üçün sonadək mübarizə aparacaq: "Tənqidi fikir daşıyıcılarının yaxın qohumlarının qanunsuz həbs olunması ölkəmizin demokratik imicinə xələl gətirən rəzalətdir".

Sonolay.org,
Roma Turançı