ABŞ-dan Ermənistanı qorxuya salan YENİ QARABAĞ PLANI

ATƏT-in Minsk qrupunun amerikalı həmsədri Roçard Hoqlandın “Vaşinqton Dağlıq Qarabağ münaqişəsində daha da aktivləşməlidir” sözləri, eləcə də Gürcüstanın müdafiə naziri Levan İzorianın ABŞ-a səfəri “Birləşmiş Ştatlar Cənubi Qafqazda aktivləşir” sualını gündəmə gətirdi.

Publika.az-ın xəbərinə görə, L.İzoria ABŞ-da görüşlərdən sonra bəyan etdi ki, Gürcüstanın müdafiə sahəsində amerikalılarla birlikdə yeni proqram hazırlığına başlayırlar. O, Vaziani bölgəsində Gürcüstan və ABŞ-ın birgə döyüş hazırlığı mərkəzi inşa etdiklərini də vurğuladı.

Bunun fonunda Riçard Hoqlandın Dağlıq Qarabağla bağlı açıqlamaları da diqqət çəkir.

“Mən razıyam ki, biz daha aktiv olmalıyıq. Lakin ABŞ-ın yeni administrasiyasının erkən dövründəyik. Yeni administrasiya hələlik xarici siyasi kursu və komandanı hazırlayır. Ona görə də gəlin bir az dözümlü olaq. Görəcəyik ki, yaxın aylarda bütün bunlar inkişaf edəcək”, - deyə o, vurğulayıb.

Erməni ekspertlər amerikalı həmsədrin bu açıqlamasını Vaşinqtonun Dağlıq Qarabağ münaqişəsinin nizama salınmasında yeni gediş hazırlığı kimi şərh ediblər.

Erməni jurnalist Naira Ayrumyan isə qeyd edib ki, ABŞ təmas xəttində atəşkəsə nəzarət mexanizminin qurulması ilə bağlı tələbindən imtina edə bilər.

Qeyd edək ki, atəşkəsə nəzarət mexanizmi ABŞ tərəfindən təklif olunub. Bu, Ermənistanın işğalçı siyasətinə şərait yaratdığı üçün Azərbaycan tərəfindən rədd edilib. Həmçinin, Rusiya da bu mexanizmlərin qurulmasına qarşı çıxır. Ermənistan isə israrla bu mexanizmlərin qurulmasını istəyir.

N.Ayrumyan yazır ki, əgər ABŞ və Rusiya razılaşacağı təqdirdə mexanizmlərin qurulması məsələsi arxa plana keçə bilər.

“Bu gün Rusiya xarici işlər naziri Sergey Lavrovun Amerikada keçirəcəyi görüşlərdə bu məsələ müzakirə oluna bilər. Riçard Hoqlandın sözlərinə görə, Rusiya və ABŞ Qarabağ məsələsində sıx əməkdaşlıq edirlər. Deməli, mexanizm məsələsində də razılaşa bilərlər”, - deyə o bildirib.