“Meydan TV” xəbər saytında dərc olunmuş “İcra başçısı məhkəmə qərarı olmadan Ağsu dolaylarındakı kafeləri sökdürür” başlıqlı məqalə ilə əlaqədar T Ə K Z İ B
gundem / olke
10:41
17.08.2020
1 459
“Meydan TV” xəbər saytında dərc olunmuş “İcra başçısı məhkəmə qərarı olmadan Ağsu dolaylarındakı kafeləri sökdürür” başlıqlı məqalədə yayımlanan müraciətində Cəfərov Asif Əlisa oğlu Ağsu şəhəri, Qaçaq Nəbi küçəsi, 5 saylı evdə yaşayan Cəfərova Nüşabə Əlisa qızına məxsus Ağsu dolaylarında yerləşən iaşə obyektinin Ağsu Rayon İcra Hakimiyyəti və digər mərkəzi icra hakimiyyəti orqanlarının əməkdaşları tərəfindən söküldüyünü bildirməklə ona köməklik göstərilməsini xahiş etmişdir.
Bildiririk ki, respublika ərazisində turizmin inkişafı ilə bağlı Şimal-qərb turizm koridoru-kommersiya obyektlərinin inkişaf konseptinə uyğun olaraq Ekologiya və Təbii Sərvətlər Nazirliyinin, Dövlət Turizm Agentliyinin, peşəkar memarlar və aidiyyəti qurumların nümayəndələri tərəfindən Muğanlı-İsmayıllı və Bakı-Şamaxı-Yevlax avtomobil yolunun rayon ərazilərindən keçən hissəsində fəaliyyət göstərən iaşə obyektlərinə vizual baxış keçirilmiş və əksər obyektlərin sanitar-gigiyenik tələblərə, Tikinti Norma və Qaydalarına uyğun olmadığı, mənəvi cəhətdən köhnəldiyi, yolun mühafizə zolağında tikildiyi və Ekologiya və Təbii Sərvətlər Nazirliyi tərəfindən müqavilələri olmadığı müəyyən edilmişdir.
Həmin obyektlərin sahibləri ilə söhbətlər aparılmış, obyektlərin layihə əsasında yenidən rekonstruksiya olunması barədə razılığa gəlinmiş və sahibkarlar tərəfindən tikinti-quraşdırma işlərinə başlanılmışdır. Bu sahədə aparılan işlər mərkəzi icra hakimiyyəti orqanlarının nümayəndələrindən ibarət səlahiyyətli komissiyanın nəzarəti altında həyata keçirilir.
Söküntü materiallarının daşınması və digər işlərin görülməsində müraciətləri əsasında RİH tərəfindən sahibkarlara müvafiq köməkliklər göstərilmişdir. Bundan başqa Ekologiya və Təbii Sərvətlər Nazirliyi ilə sahibkarlar arasında obyektlərin yerləşdiyi torpaq sahəsindən istifadəyə görə müqavilə bağlanacaqdır.
Nəzərinizə çatdırırq ki, N.Cəfərovanın 14 avqust 2002-ci il tarixdə rayonun Aratlı Curuğlu kənd sakini Səfdərov Cabir Seyidrza oğlundan alqı-satqı müqaviləsi ilə aldığı Bakı-Qazax şosse yolunun 150.1 km-də, yolun sağ tərəfində 39 kvm sahədə yerləşən ümumi sahəsi 10.4 kvm olan yeməkxana binası yolun mühafizə zolağında və meşə fonduna aid ərazidə qanunsuz tikilmişdir. Bununla əlaqədar onun tərəfindən rayon İcra hakimiyyətinə təqdim olunan Azərbaycan Respublikasının Nəqliyyat Nazirliyi "Yolnəqliyyatservis" Departamenti Yolların Mühafizəsi Xidməti MMC-nin hələ 27 dekabr 2004-cü il tarixdə ona ünvanlanan 01/92 saylı məktubundan bir daha aydın olur ki, ona məxsus kafenin nəqliyyat vasitələrinin hərəkətinə maneəçilik törədən qurğuları sökülmüş, lakin kafenin mühafizə zolağına düşən 5 metrlik hissəsinin də kənarlaşdırılması tələb olunmuşdur. 30 noyabr 2004-cü il tarixli ərizəsi nəzərə alınaraq kafenin söküntüsü gələcəkdə yolun genişləndirilməsi və layihələndirilməsi zərurəti yaranacağı halda sökülüb yol oxuna nisbətində 30 metir məsafəyə çəkilməsi onun tərəfindən həyata keçiriləcəyi şərti ilə dayandırılmışdır.
Bundan əlavə, yeməkxananın yerləşdiyi ərazi Şamaxı Regional Meşə Təsərrüfatı Mərkəzinin Ağsu meşəbəyliyi 8 saylı meşə dolayının 32-ci kvartalının 28-ci bölməsində yerləşməklə meşə fonduna aiddir. Müqavilə şərtlərinə əsasən ona istifadə üçün verilən ərazidə və onun əhatəsində heç bir əsaslı tikinti aparmadan, meşə fond torpaqlarının vəziyyətini pisləşdirmədən, ətraf mühitə zərər vurmadan, meşədə yanğına qarşı təhlükəsizlik, sanitariya-gigiyena qaydalarına əməl etməklə ərazidə müvafiq olaraq çadır tipli və ya sökülüb-yığılan yüngül konstruksiyalı qurğulardan istifadə etməli olduğu halda buna əməl edilməmiş və orada əsaslı tikinti aparılmışdır. 2004-cü ildə Şamaxı Meşə Mühafizəsi və Bərpası Müəsissəsi ilə hüquqi qüvvəsi olmayan bir il müddətində icarə müqaviləsi bağlanılmışdır.
Azərbaycan Respublikası Ekologiya və Təbii Sərvətlər Nazirliyi yanında Meşələrin İnkişafı Xidmətinin Şamaxı Regional Meşə Təsərrüfatı Mərkəzinin rayon İcra hakimiyyətinə təqdim etdiyi 03 iyun 2020-ci il tarixli, 388 nömrəli məktubdan aydın olur ki, N.Cəfərova tərəfindən müqavilə şərtlərinin kobud şəkildə pozulduğuna görə inşa olunan qanunsuz əsaslı tikili qardaşı Cəfərov Ağanəsib Əlisa oğlunun iştirakı ilə Şamaxı Regional Meşə Təsərrüfatı Mərkəzinin əməkdaşları tərəfindən sökülmüş və sökülən tikinti materialları ünvanına aparılmışdır.
N.Cəfərovaya bildirilmişdir ki, ərazidə tikinti quraşdırma işlərinə başlayacağı təqdirdə inşa ediləcək obyekt üçün ona xərci ödənilmədən tikinti layihəsi təqdim ediləcəkdir.
Odur ki, N.Cəfərovanın Ağsu Rayon İcra Hakimiyyəti qarşısında tələbi əsassızdır. Həmçinin, A.Cəfərovun RİH başçısı haqqında məqalədə bildirdiyi fikirlər həqiqətə uyğun deyildir.
Əlavə olaraq bildiririk ki, Muğanlı-İsmayıllı və Bakı-Şamaxı-Yevlax avtomobil yolunun rayon ərazilərindən keçən hissəsində fəaliyyət göstərən iaşə obyektlərində aparılan tikinti-quraşdırma işlərini N.Cəfərova istisna olmaqla bütün obyekt sahibləri razılıqla qarşılayır, işləri böyük ruh yüksəkliyi və həvəslə icra edirlər.
Yuxarda qeyd olunan dəqiqləşmiş məlumatları nəzərə alaraq bu Təkzibin saytınızda paylaşılmasını xahiş edirirk.
Qeyd: Obyektlərin əvvəlki və təmir-quraşdırma işlərindən sonrakı vəziyyətlərini əks etdirən video və fotoşəkillər Təkzibə əlavə olunur
Ağsu Rayon İcra Hakimiyyəti
Oxşar xəbərlər
XƏBƏR LENTİ
© 2014-2023 Azerinform.az
Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.