Həkim-kardioloq Ramella Quliyeva: Qarşıdakı günlərdə ürək-damar problemləri olanlar diqqətli olmalıdırlar

Bakı, 28 sentyabr, Azərinform, G.Vəliyev. Ölkədə müşahidə edilən durğun və nisbətən rütubətli hava meteohəssas insanlar üçün əlverişsiz hesab edilir. Ona görə da həkimlər bir sıra xəstəliklərdən əziyyət çəkənləri qarşıdakı üç gündə diqqətli olmağa çağırır.

Bu barədə Azərinform-a açıqlamasında, 15 saylı Birləşmiş şəhər xəstəxanasənın baş həkimi, həkim-kardioloq Ramella xanım Quliyeva bildirib.

Onun sözlərinə görə, əsasən ürək-damar problemləri olan xəstələrin diqqətli olmasına ehtiyac var: "Hər hansı bir orqanizm hərarətin qalxmasına damar genişlənməsi ilə cavab verir. Damarlar genişlənəndə arterial təzyiq aşağı enir. Bu vəziyyətdə qan dövranını normada saxlamaq ücün ürək daha da çox işləməlidir. Xəstə ürək üçün isə bu çətindir.

Həmçinin istidə orqanizm çox maye itirir. Maye ilə bir yerdə mineral duzlar, əsasən kalium və maqnezium duzları bədəndən xaric olunur ki, bunlar da ürək ritminin normada saxlanması üçün vacibdir. Çünki su-duz mübadiləsinin ciddi pozulması ürəyin dayanmasına gətirib çıxara bilər.
Bədən susuzlaşanda qan qatılaşır, damarlar genişlənir və bu vaxt damarlarda trombların, yəni qan laxtalarının əmələ gəlmə riski artır. Bu da infarkt, insult və ağciyər emboliyalarının sayını artırır".

R.Quliyeva bildirib ki, bu halların baş verməməsi üçün belə havalarda, günün isti saatlarında meteohəssas insanların evdə oturmaları məsləhətdir. Həmçinin bədənin susuzlaşmaması üçün bol miqdarda maye qəbul edilməlidir.