Qiyamın baş memarı ABŞ-ın İstanbuldakı konsulluğunda gizlədilir? – ŞOK İDDİA

Türkiyə mediası 15 iyul dövlət çevrilişinə cəhdin əsas təşkilatçısı hesab edilən Adil Öksüzlə bağlı şok bir iddia irəli sürüb.
azerinform.az xəbər verir ki, baş qiyamçının ABŞ-ın İstanbul Baş konsulluğunda gizləndiyi ehtimal edilir.
Adil Öksüz hazırda axtarılır. Onun böyük ehtimalla ölkə daxilində olduğu deyilir. Həm ekspertlər, həm də rəsmilərinin fikrincə, Adil Öksüz ölkədən çıxa bilsəydi, digər qaçan FETÖ-cülər kimi özünü göstərirdi.
Bir neçə gün əvvəl yayılan xəbərə görə, Türkiyənin hüquq-mühafizə orqanları çevriliş cəhdindən 6 gün sonra – iyulun 21-də Adil Öksüzün mobil telefonuna ABŞ-ın İstanbuldakı Baş konsulluğunda qeydiyyatda olan nömrədən zəng edildiyini müəyyənləşdiriblər. Bu fakt prokurorluq tərəfindən yaxın günlərdə məhkəməyə təqdim ediləcək istintaq aktında qeydə alınıb. Qeyd edək ki, ötən ilin noyabrında Ankara prokurorluğu Türkiyədə dövlət çevrilişinə cəhdin iki əlaqələndiricisi – Adil Öksüz və Kamal Batmazın 2016-cı ildə 4 dəfə ABŞ-da olduğunu bildirib.
Fəthullah Gülən başda olmaqla, ABŞ-da olan FETÖ-çülərin ekstradisiyası və Adil Öksüzün mobil telefonuna ABŞ-ın İstanbuldakı Baş konsulluğunda qeydiyyatda olan nömrədən zəng edilməsi dünən Türkiyədə səfərdə olan ABŞ-ın dövlət katibi Reks Tillersonla keçirilən görüşlərdə də diqqət mərkəzində olub.
Türkiyə mediası yazır ki, ABŞ səfirliyi Adil Öksüzün vizasının ləğv edilməsi səbəbi ilə ona zəng edildiyini açıqlasa da, Türkiyənin ədliyyə naziri Bəkir Bozdağ və xarici işlər naziri Mövlud Çavuşoğlunun bəyanatları şübhələri aradan qaldırmır.
Bəkir Bozdağın sözlərinə görə, “bəziləri” Adil Öksüzü Türkiyədə gizlədir. Bu bəyanatın isə ABŞ-ın İstanbul Baş konsulluğundan Öksüzə zəng edildiyinə dair xəbərlərdən sonra verilməsi isə diqqət çəkir. ”Hürriyet” yazarı Fatih Çekirge hesab edir ki, Bəkir Bozdağın sözləri bu anlama gəlir: “Bəziləri FETÖ-nün açar adamı olan Adil Öksüzü Türkiyədə gizlədir. Polisin Türkiyədə əlinin çata bilməyəcəyi yerlər bəllidir. Diplomatik missiyalar... "
Onun sözlərinə görə, Türkiyə Milli İstihbarat Təşkilatının (MİT) və polis kəşfiyyatı da hökumətə bu məlumatı verib: “Öksüz çölə çıxmadığı üçün Türkiyədə bir yerdədir. Amma əlimizim çatmadığı bir yerdədir”.
“Əminəm ki, hazırda ABŞ Baş konsulluğunun ətrafı MİT-in mühasirəsindədir. Mən ABŞ kimi bir ölkənin “FTB serialları”ndan kənar belə bir işlə əlaqəli olacağını düşünmək istəmirəm”, - deyə “Hürriyyət”in yazarı qeyd edib.
Adil Öksüzün mobil telefonuna ABŞ-ın İstanbuldakı Baş konsulluğunda qeydiyyatda olan nömrədən zəng edilməsi Reks Tillersonla Çavuşoğlunun görüşündə də müzakirə edilib.
“Türk polisinin axtardığı Adil Öksüzə ABŞ Baş konsulluğundan zəng edilib. Bunun normal olduğunu söyləyirlər. Təbii ki, biz də buna inanmaq istəyirik. Amma lazımı araşdırmalar aparılacaq”, - Türkiyə xarici siyasət idarəsinin rəhbəri həmkarı ilə birgə keçirdiyi mətbuat konfransında deyib.