Xırdalan rayonu 1 nömrəli tam orta məktəbin direktoru Arifə Balakişiyeva barədə yayılan məlumatlar həqiqəti əks etdirmir - MÖVQE

Ölkədə azad və məsuliyyətli medianın rolu danılmazdır. Cəmiyyətin doğru informasiya ilə təmin olunması, baş verən hadisələrin obyektiv təhlili və ictimai maraqların qorunması hər bir KİV-in əsas missiyası olmalıdır. Lakin təəssüf hissi ilə qeyd etməliyik ki, son dövrlər bəzi media subyektləri araşdırma aparmadan, faktları dəqiqləşdirmədən, birtərəfli və qərəzli materiallar yaymaqla peşə etikasını kobud şəkildə pozurlar. Bu cür yanaşma nə jurnalistika prinsiplərinə, nə də cəmiyyət qarşısında daşıdıqları məsuliyyətə uyğundur.

Son günlər Xırdalan 1 nömrəli tam orta məktəbin direktoru Arifə Balakişiyeva barədə yayılan yazılar da məhz bu qəbildəndir. Heç bir əsaslı sübut və fakt ortaya qoyulmadan, köhnə və şişirdilmiş iddiaların dövriyyəyə buraxılması açıq-aşkar qərəzli kampaniya təsiri bağışlayır. Bu cür materiallarda obyektivlik deyil, məqsədli şəkildə imic zədələmək cəhdi hiss olunur.

Qeyd etmək lazımdır ki, hər hansı şəxs barəsində irəli sürülən ittiham xarakterli məlumatlar hüquqi məsuliyyət yarada bilər. Böhtan və şər xarakterli iddialar Azərbaycan qanunvericiliyinə əsasən məhkəmə predmeti ola bilər və bu halda məsuliyyət həmin məlumatları yayanların üzərinə düşür. Peşəkar jurnalistikanın əsas prinsipi faktın dəqiqliyi və qarşı tərəfin mövqeyinin öyrənilməsidir. Əks halda bu, jurnalistika deyil, sifarişli qaralama kampaniyası təsiri bağışlayır.

Arifə Balakişiyeva uzun illərdir təhsil sahəsində fəaliyyət göstərən, rəhbərlik etdiyi kollektivdə intizamı, işgüzarlığı və təşkilatçılıq qabiliyyəti ilə seçilən bir ziyalıdır. Onu yaxından tanıyanlar yaxşı bilirlər ki, o, vəzifəsini şəxsi maraq üçün deyil, dövlətə və xalqa xidmət anlayışı ilə icra edir. Onun həyat yolu sadəlikdən məsuliyyətli rəhbərliyə doğru zəhmət və əzmlə yüksəlməyin nümunəsidir.

Rayon ictimaiyyəti arasında qazandığı hörmət təsadüfi deyil. Bu, illərlə formalaşan etimadın nəticəsidir. Əgər ortada real fakt və hüquqi əsas olsaydı, bu məsələ müvafiq qurumlar tərəfindən araşdırılar və hüquqi qiymətini alardı. Lakin fakt əvəzinə emosional və şişirdilmiş ifadələrə üstünlük verilməsi yazılanların qərəzli xarakter daşıdığını açıq göstərir.

Təəssüf doğuran məqamlardan biri də odur ki, bəzi qələm sahibləri eyni mövzunu dəfələrlə təkrarlayaraq “xarab olmuş qramafon valı” effekti yaradır, yeni fakt təqdim etmədən ictimai rəyi manipulyasiya etməyə çalışırlar. Halbuki cəmiyyət artıq informasiyanı süzgəcdən keçirməyi bacarır. İnsanlar əsassız ittihamla obyektiv tənqidi ayırd edə bilir.

Bir daha vurğulamaq istəyirik ki, Xırdalan 1 nömrəli tam orta məktəbin direktoru Arifə Balakişiyevain hər hansı müdafiəyə ehtiyacı yoxdur. Onun fəaliyyəti göz önündədir və gördüyü işlər öz sözünü deyir. Bu yazının məqsədi hansısa qarşıdurma yaratmaq deyil, qərəzli və əsassız məlumatların ictimai rəyə təsir etməsinin qarşısını almaqdır.

Media nümayəndələrinə çağırış edirik: tənqid edin, amma faktla; araşdırın, amma vicdanla; yazın, amma məsuliyyətlə. Şəxsi və ya qrup maraqlarına xidmət edən qaralama kampaniyaları nə jurnalistikanın nüfuzuna, nə də cəmiyyətin informasiya təhlükəsizliyinə xidmət edir.

Unutmaq olmaz ki, el gözü tərəzidir. Cəmiyyət hər şeyi görür və qiymətini verir. Əsassız böhtanlar isə nə qədər şişirdilsə də, həqiqətin qarşısında davam gətirə bilmir.