Saatlıda bu il 17 min hektardan çox sahədə pambıq əkiləcək

Saatlıda keçən təsərrüfat ilinin təcrübəsi, pambıqçılığın inkişafı ilə bağlı yaradılan hərtərəfli şərait, müasir innovativ texnologiyaların tətbiqi, eləcə də dövlət tərəfindən göstərilən maliyyə və digər zəruri dəstək istehsalçıları daha da ruhlandırıb, cari ildə onlarda pambıq əkininə olan marağı daha da artırıb. Təsadüfi deyil ki, cari ildə fermerlər ötən illə müqayisədə 2 dəfə çox, yəni, 17150 hektar sahədə pambıq əkəcəklər. Ötən təsərrüfat ilindən fərqli olaraq, bu il aqrotexniki qaydalara əməl etməklə işlərə vaxtında başlanılıb, artıq 16 min hektardan çox sahədə şum aparılıb.

AZERİNFORM.AZ xəbər verir ki, bu məqsədlə uzun illərdən bəri rayonun Bəylər kəndi ərazisində, eləcə də Arazqırağı və Mil-Muğan kollektorunun ətrafında istifadəsiz qalan torpaqlar əkin dövriyyəsinə qaytarılıb. Artıq torpaq sahəsi şumlanaraq əkinə hazır vəziyyətə gətirilib. Bir neçə gündür ki, rayonda çiyid səpininə başlanılıb. Havaların əlverişli keçməsindən istifadə edən fermerlər səpini yaxın günlərdə başa çatdıracaqlar.
Dövlət tərəfindən pambıqçılığın inkişafına diqqət göstərilməsi fermerlərin bu sahəyə marağını artırıb. Hazırda iri fermerlərlə yanaşı, 3-4 hektar pay torpağı olan təsərrüfat sahibləri də “ağ qızıl” yetişdirməyə başlayıblar. Onlar müqavilə bağladıqları şirkətlər tərəfindən kənd təsərrüfatı texnikaları, toxum, dərman preparatları və gübrələrlə təmin olunurlar. Pambıq yetişdirilməsi ilə bağlı fermerlərin gələcəkdə qarşılaşacaqları çətinlikləri aradan qaldırmaq məqsədilə rayonda təcrübəli aqronom və digər kənd təsərrüfatı mütəxəssislərindən ibarət qərargah da yaradılıb.
Onu da qeyd edək ki, bu il rayonda pambıq sahələrinin 17 min hektardan cox sahədə pambıq yetişdiriləcək.