Putin-Fitso görüşü: Çətin vəziyyət yaranıb

Rusiya Prezidenti Vladimir Putin və Slovakiyanın Baş naziri Robert Fitso Kremldə keçirilən danışıqlarda ikitərəfli əlaqələr və enerji məsələlərini müzakirə edib.

Axar.az xəbər verir ki, bunu Rusiya Prezidentinin mətbuat katibi Dmitri Peskov deyib.

“Dünən Putin Fitso ilə danışıqlar aparıb. Biz enerji və qaz məsələlərindən də danışdıq. Kifayət qədər ətraflı söhbət oldu”, - o bildirib.

Peskov Rusiyanın Ukrayna ilə tranzit sazişinin müddəti başa çatdıqdan sonra Slovakiyaya qaz nəqlini davam etdirmək imkanının olub-olmaması sualına belə cavab verib:

“Slovakiyaya enerji tədarükü məsələsi əlavə diqqət tələb edir. Ukrayna tərəfinin bəyanatını eşitmisiniz, Rusiya qazını almağa davam edən və bunu öz iqtisadiyyatlarının normal fəaliyyəti üçün zəruri hesab edən Avropa ölkələrinin mövqeyini də bilirsiniz. Ona görə də indi burada çox çətin vəziyyət yaranıb”.

Qeyd edək ki, Ukrayna 1 yanvar 2025-ci ildən Rusiya qazının tranzitini tamamilə dayandıracağını açıqlayıb.