Ağsu rayonunda silsilə tədbirlər davam edir - ÖZƏL

gundem / region

15:30 9.01.2020 892

Ağsu rayonunda silsilə tədbirlər davam edir - ÖZƏL

Rayon İcra Hakimiyyətinin başçısı Dilman və Nuran kəndlərində səyyar qəbul keçirib

Ağsu Rayon İcra Hakimiyyətinin başçısı Vahid Tağıyev 26 dekabr 2019-cu il tarixdə hüquq-mühafizə orqanlarının, əlaqədar idarə və təşkilat rəhbərlərinin iştirakı ilə Dilman və Nuran kəndlərində vətəndaşları qəbul edib.
Həmin kəndlərdə keçirilmiş səyyar qəbullarda RİH baçşısı ölkə rəhbəri cənab İlham Əliyevin əhalinin maddi-rifahının yüksəldilməsi, yeni iş yerlərinin yaradılması, işsizliyin və yoxsulluğun minimuma endirilməsi, əmək haqqı, pensiya və müavinətlərin davamlı şəkildə artırılması istiqamətində həyata keçirdiyi geniş miqyaslı işlərdən danışıb.
Rayon rəhbəri ölkə başçısı tərəfindən 05.02.2019-cu ildə baş vermiş zəlzələ zamanı İsmayıllı, Şamaxı və Ağsu rayonlarının yaşayış məntəqələrində ziyan dəymiş fərdi yaşayış evləri ilə bağlı verdiyi Sərəncamların humanist addım olduğunu, hazırda Kalva və Nuran kənd inzibati ərazi dairəsinə daxil olan kəndlərdə təbii fəlakətin fəsadlarının aradan qaldırılması məqsədilə FHN-nin mütəxəssislərindən ibarət komissiyanın rəyinə əsasən müvafiq işlərin görüldüyünü bildirib.
Səyyar qəbullarda Dilman və Nuran kənd sakinləri tərəfindən içməli su xəttinin bərpa olunması, həyətyanı torpaq sahələrinin ayrılması, elektrik verilişi xətlərinin təmiri, kənd yollarının cari təmiri, ünvanlı dövlət sosial yardım təyini, zəlzələdən ziyan çəkmiş fərdi yaşayış evlərinin bərpası, torpaq sürüşməsi ilə bağlı yaranmış çətinliklərin aradan qaldırılması, eləcə də digər yerli əhəmiyyətli sosial problemlərin həlli ilə əlaqədar xahiş və təkliflər səsləndirilib.
Dilman, Nuran kəndlərində keçirilən səyyar görüşlərdə vətəndaşların müraciət və təklifləri araşdırılaraq nəzarətə götürülüb, mövcud problem və çətinliklərin qısa müddətdə aradan qaldırılması ilə bağlı aidiyyəti vəzifəli şəxslərə müvafiq tapşırıqlar verilib.

Rayonda Dünya Azərbaycanlılarının Həmrəylik Günü və Yeni il bayramı münasibətilə silsilə tədirlər keçirilib

Ağsu şəhərinin mərkəzindəki Heydər Parkında Dünya Azərbaycanlılarının Həmrəylik Günü və Yeni il bayramı təntənəli şəkildə qeyd olunub.
Səhər saatlarında parka gələn rayon rəhbərləri, idarə və təşkilatların kollektivləri, ictimaiyyət nümayəndələri əvvəlcə ümummilli lider Heydər Əliyevin abidəsini ziyarət edib, önünə güllər düzüblər.
Bayramsayağı bəzədilən parkda, açıq havada keçirilən bayram tədbirində rayon icra hakimiyyətinin başçısı Vahid Tağıyev iştirakçıları təbrik edərək Dünya Azərbaycanlılarının Həmrəylik Gününün dünyanın bütün qitələrində yaşayan azərbaycanlıları - soydaşlarımızı birləşdirən, həmrəy, həmfikir edən, onları Vətənimizin bütövlüyü, daha da çiçəklənməsi üçün birgə fəaliyyətə çağıran tarixi bir gün olduğunu vurğulayıb.
Qeyd olunub ki, ümummilli lider Heydər Əliyevin milli birlik və azərbaycançılıq ideyaları bu gün Prezident İlham Əliyev tərəfindən uğurla davam etdirilir. Dövlətimizin başçısı dünya azərbaycanlılarının həmrəyliyinə verdiyi töhfələrlə, ölkə hüdudlarından kənarda yaşayan azərbaycanlılarda milli ruhun yüksəlməsi ilə əlaqədar səmərəli və ardıcıl fəaliyyəti ilə, milli-mənəvi dəyərlərimizin təbliğinə və qorunmasına əlverişli şərait yaratmaqla dünya azərbaycanlılarının dərin rəğbətini qazanıb.
Bayram tədbiri rəngarəng konsert proqramı ilə davam edib. Yolka ətrafında uşaq bağçalarının fidanları və məktəblilər şənlik edib, Şaxta baba və Qar qız şənliyə xoş əhval-ruhiyyə qatıb. Uşaqların əl işlərindən ibarət sərgi, musiqi məktəbi şagirdlərinin, o cümlədən nağaraçılar qrupunun çıxışları şənliyə qatılanlar tərəfindən maraqla qarşılanıb.
*************************
Azərbaycan Təhsil İşçiləri Azad Həmkarlar İttifaqının (ATİAHİ) Ağsu rayon komitəsi 31 dekabr – Dünya Azərbaycanlılarının Həmrəylik Günü və Yeni il bayramı münasibətilə təntənəli mərasim təşkil edib. Bayram süfrəsi arxasında təşkil olunan mərasimdə bağça uşaqlarından, ümumtəhsil məktəblərinin fəal şagirdlərindən, qabaqcıl müəllimlərdən, həmkarlar ittifaqı fəallarından ibarət 180 nəfər iştirak edib.
Rayon icra hakimiyyəti başçısının müavini Sevil Mirzəliyeva Dünya Azərbaycanlılarının Həmrəylik Günü və Yeni il bayramı münasibətilə iştirakçıları təbrik edib, dünyanın müxtəlif ölkələrində məskunlaşan azərbaycanlıların təşkilatlanmasında ümummilli lider Heydər Əliyevin, onun siyasi varisi Prezident İlham Əliyevin xidmətlərindən danışıb.
Rayon musiqiçilərinin rəngarəng konsert proqramı ilə davam edən şənlikdə bir-birini əvəz edən mahnı və rəqslər hər kəsdə yüksək bayram əhval-ruhiyyəsi yaradıb.
Tədbirlərdə balacalara və məktəblilərə bayram hədiyyələri verilib.