Bakının Nizami rayonunda icra başçısı “COŞUB” – Coşqun Cəbrayılov kimə arxalanır? -VİDEO
gundem / region
22:54
17.08.2022
447
18 fevral 2022 – ci ildə Prezidentin sərəncamı ilə Coşqun Adil oğlu Cəbrayılov Bakı şəhəri Nizami Rayon İcra Hakimiyyətinin başçısı təyin edilib.
Qeyd edək ki, C.Cəbrayılov bu vəzifəyə təyin olunana qədər Bakı Şəhər İcra Hakimiyyətinin Ərazi idarəetmə və yerli özünüidaretmə orqanları ilə iş şöbəsinin müdiri olub. O, bu vəzifəyə 2018-ci ilin sentyabrında təyin olunmuşdu.
Coşqun Cəbrayılov daha əvvəl isə Səbail Rayon İcra Hakimiyyətində və Sumqayıt Şəhər İcra Hakimiyyətində Ərazi idarəetmə və yerli özünüidarəetmə orqanları ilə iş şöbəsinin müdiri vəzifəsində çalışıb.
Reallıq.tv – yə daxil olan məlumatda qeyd olunur ki, Coşqun Cəbrayılov ötən müddətdə icra başçısı kimi ümidləri doğrultmayıb. İcra başçısı ayda bir dəfə səyyar görüşlər təşkil etmək adı ilə “JEK” işçilərini icra hakimiyyətinin zalına toplayaraq şəkillər çəkməklə işini yekunlaşdırmış hesab edir. Nizami rayonunda qalaq-qalaq yığılan problemlərin həllində maraqlı görünməyən Cəbrayılovun qəbuluna düşmək çətin vəzifəyə çevrilib. Coşqun Cəbrayılovun vətəndaşları qəbul etməməsi ciddi narazılıq yaratdığı bir zamanda özünə ev tikmək istəyən vətəndaşlardan qanunsuz tələbdə bulunması etirazlara səbəb olub. Nizami rayonunda özünə ev tikmək istəyən vətəndaşlar icra başçısının haqqını vermədən daşı daş üstə qoya bilməzlər. Bu qanunsuz tələb tikintinin mərtəbəsi və otaqların sayına uyğun olaraq müəyyən edilir. Redaksiyamıza müraciət edən vətəndaş Asif Əliyev bildirir ki, o qanuni torpağında birmərtəbəli ev tikmək üçün 8 min manat rüşvət verməli olub.
Reallıq.Tv – yə daxil olan məlumatda o da qeyd olunur ki, Coşqun Cəbrayılov istəklərini yerinə yetirməyən vətəndaşları qanunsuz yollarla susdurur. Onun idarəetmə üsulu hazırda Bakının Nizami rayonunda böyük narazılığa səbəb olub. İcra başçısı obyekt sahiblərini də öz qanunsuz tələblərinə uyğun cəzalandıra bilir.
Rayonda yerləşən park və istirahət yerlərini biznes ocağına çevirən icra başçısının qanunsuz əməllərindən bəhs edən ərizələrdə qeyd olunan faktlar hazırda Reallıq.tv əməkdaşları tərəfindən araşdırılır. Qısa zamanda bu barədə ətraflı məlumat verəcəyik.
İlkin (Reallıq.TV)
Oxşar xəbərlər
XƏBƏR LENTİ
© 2014-2023 Azerinform.az
Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.