Elmar Məmmədyarov: “Rusiyanın Ermənistanda hərbi bazasının mövcudluğunu nəzərə alırıq”

“Rusiyanın Ermənistanda hərbi bazasının mövcudluğu Moskva və Yerevanın öz işdir, lakin Bakı bunu hər zaman nəzərə alır”.
APA-nın məlumatına görə, bu sözləri “RİA Novosti”yə müsahibəsində Azərbaycan xarici işlər naziri Elmar Məmmədyarov deyib. O xatırladıb ki, həmin hərbi baza orada Sovet İttifaqı dövründən mövcuddur: “Orada, NATO üzvü Türkiyə ilə sərhəddə kifayət qədər güclü hərbi qrup olub. İndiki halda Rusiya və Ermənistan bunu özləri müəyyən etməlidir. Lakin əlbəttə ki, təhdid və çağırışları nəzərə alaraq biz də gözüaçıq olmalıyıq”.
Nazir qeyd edib ki, Ermənistanda Rusiyaya məxsus “İsgəndər” raket komplekslərinin kodlarının kimdə olması məsələsi də açıq qalıb: “Əgər nə zamansa bir tərəf addım atırsa, təbii olaraq digər tərəf cavab verməlidir. İndiki halda biz bilirik ki, Ermənistana “İsgəndər” verilib. Lakin onların kodlarının kimdə olması sual olaraq qalır”.