Kərəm Həsənov-Abidin Fərzəliyev adı yenə MTN işində - Sensasion faktlar

Adı MTN işinə qarışmış məmurların gələcəkdə vəzifədə qalacaqlarının şübhə altında olduğunu xəbər vermişdik

Sabiq nazir Eldar Mahmudovla bu və ya digər şəkildə işbirliyi, əlaqəsi olmuş məmurlar üçün yaxşı perspektiv vəd edilmir. Bu günlərdə daha iki məmurun adı MTN işinə qarışıb.

Ləğv olunmuş Milli Təhlükəsizlik Nazirliyinin Anti-terror Mərkəzinin sabiq rəisi general Elçin Quliyevin məhkəmə prosesinə start verilib. Generalın ittiham aktında əks olunanlar bu prosesdə bir sıra sensasion məqamların üzı çıxacağını göstərir.

Bu barədə gununsesi.info-nun Elçin Quliyevin ittiham aktına istinadən verdiyi xəbərə görə, məhkəmədə dindiriləcək şəxslər arasında Nərimanov rayon icra hakimiyyətinin başçısı Abdin Fərzəliyevin qaynı Rafiq Səfərov da var.

Belə ki, vaxtilə, MTN-nin Xəzər Rayon İdarəsinin rəisi işləyən Rafiq Səfərov Elçin Quliyevin göstərişi və Əmlak Məsələləri üzrə Dövlət Komitəsinin sədri Kərəm Həsənovun razılığı ilə qanunsuz əməl törədib.

Ulus.Az xəbər verir ki, Rafiq Səfərov MTN adından istifadə edib sahibkarların pul-paralarını, mal-mülklərini əllərindən alıb.

Bu haqda iş adamı Zaur Əzimovun müraciətində də faktlar var: “Eldar Mahmudovun soyğunçu dəstəsinin kölgədə qalan üzvlərindən olan Rafiq Səfərov keçmiş nazirə yaxınlığı ilə tanınırdı.

Rafiq Səfərov hələ nazirlikdə sıravi işçi olduğu vaxtlardan Eldar Mahmudovun yaxın qohumu, əmisi oğlu və köməkçisi Vüqar Mahmudov vasitəsilə həyata keçirilən çirkin əməllərə cəlb olunmuşdu və verilən “əməliyyat” tapşırıqlarını can-başla yerinə yetirirdi.

Buna görə o, əvvəlcə MTN Xətai rayon şöbəsinə rəis müavini, daha sonra isə MTN Xəzər rayonu və MTN Binəqədi rayon şöbələrinə rəis təyin olunub.

Xəzər rayonunda işlədiyi müddət ərzində Rafiq Səfərov MTN Xəzər rayon şöbəsinin bölmə rəisi Heydər İslamovla “möhtəşəm cütlük” halında sayı-hesabı olmayan qanunsuz əməllərə imza atıblar.

Rafiq Səfərov Vüqar Mahmudovun köməkliyi ilə MTN monitorinq mərkəzinin işçisi Anar adlı şəxslə iş adamlarının və vəzifəli şəxslərin telefon danışıqlarına qulaq asaraq daha sonra onları şantaj ediblər.

Ulus.Az xəbər verir ki, MTN Xəzər rayon şöbəsinin rəisi vəzifəsini icra etdiyi zaman Xəzər Rayon İcra Hakimiyyətinin 7-8 qəsəbə nümayəndələrinə, bələdiyyə sədrlərinə İrana casusluqda və “Hizbullah”ı maliyyələşdirməkdə ittiham edəcəyi ilə hədə-qorxu gələrək, Rafiq Səfərov və Heydər İslamov yaxınlarının və özlərinin adına xeyli torpaq sənədləşdiriblər.

Bu barədə Prezident Administrasiyasına yazılı məruzə edilib, həmin müraciət araşdırılması üçün Xəzər Rayon İcra Hakimiyyəti başçısına göndərilib.

Lakin 1995-ci ildən Xəzər Rayon İcra Hakimiyyətinin başçısı vəzifəsində işləyən Gülağa İslamov bu məlumatın “əsassız, şişirdilmiş və böhtan xarakterli olduğunu” deyib. Amma bundan sonra Rafiq Səfərov MTN Xəzər rayon şöbəsinin rəisi vəzifəsinə təsdiq olunmur, oradan MTN Xətai şöbəsinə rəis vəzifəsinin icraçısı kimi göndərilir. Bütün bu işləri görən R.Səfərov isə Nərimanov rayon icra başçısının qaynıdır.

Azerinform.az