Çində “Hyundai” adı altında çalışan fırıldaqçılar 87 milyon dollar qazandılar

Cənubi Koreya sənayesinin nəhəngi “Hyundai” adı altında fəaliyyət göstərən fırıldaqçılar səkkiz il ərzində ən azı 87 milyon dollar qazanıblar.
TASS-a istinadən yayılan xəbərdə deyilir ki, bu barədə “Global Times” qəzeti məlumat yayıb.
Nəşrin məlumatına görə, cinayətkarlar Honkonqda kapitalı 50 min Honkonq dollar təşkil edən “Hyundai RNC Investment Group Ltd” şirkətini qeydiyyatdan keçiriblər. 2009-cu ildə Handane məmurlarına bu əraziyə investisiyaların cəlb edilməsi üzrə layihə təqdim ediblər, 2011-ci və 2013-cü ildə hakimiyyət həmin şirkətə 600 milyon yuan (təxminən 87,3 milyon dollar) vəsait ayırıb.
Qəzet yazır ki, fırıldaqçıların layihəsi 666 min kvadratmetr ərazidə avtomobillərin texniki xidmət stansiyasının, eləcə də Hyundai Beynəlxalq sərgi avtomobil mərkəzinin tikilməsini nəzərdə tuturdu.
Qəzetin məlumatına görə, məmurlar səkkiz il ərzində şirkət ilə əməkdaşlıq edərkən onun “Hyundai” şirkətinə məxsus olmasını yoxlamağa cəhd etməyiblər.
Məlumata görə, hazırda şirkətin Handanedə bütün layihələri və aktivləri dondurulub. Cənubi Koreya şirkətinin Pekin nümayəndəliyi bu regiona heç bir investiya yatırmadığını bəyan edib.