Azərbaycan ordusunun Xankəndiyə hücumu - TƏCİLİ

Erməni general məğlubiyyətlərinə haqq qazandırmağa çalışır

Aprel döyüşlərində Azərbaycan ordusunun Xankəndiyə girməyi planlaşdırması barədə ermənilərin uydurduqları iddiaların heç bir əsası yoxdur və döyüşlərdən sonra Ermənistanda hakim kəsilmiş qorxunu dağıtmağa xidmət edir.

İstiPress-ə bu barədə Azərbaycan Müdafiə Nazirliyinin keçmiş əməkdaşı, polkovnik Üzeyir Cəfərov Xocalı soyqırımına rəşbərlik edən quldurlardan biri, özünü general adlandıran Vitali Balasanyanın “Mediamaks” agentliyinə verdiyi müsahibəsini şərh edərkən bildirib.



Vitali Balansanyan müsahibəsinə 2016-cı ildə baş vermiş aprel döyüşlərindən bəhs edib:

"Düşmənin planı aşağıdakı kimi idi: dördüncü və ya beşinci gün Ağdam ətrafında cəbhə xəttini yarmalı idilər və Xankəndiyə qədər getməli idilər. Onların hesablamalarına görə, əllərində olan arsenalın hesabına Azərbaycan bu planı gerçəkləşdirə bilər. Bizsə əmin idik ki, gerçəkləşdirə bilməz: bizim mövqelər, ordumuzun döyüş qabiliyyəti, artilleriyamız, hava hücumundan müdafiə sistemimiz və başqa qüvvələrimiz müdafiə olunmağa, hətta lazım olanda əks hücuma keçməyə imkan verirdi".



Üzeyir Cəfərov Vitali Balasanyanın bu sözlərini tam cəfəngiyyat adlandırıb: “Seyran Ohanyandan sonra Vitali Balasanyanı müdafiə naziri qoymağa söz vermişdilər. Amma bu vədə əməl etmədilər. İndi yenə bu cür cəfəng ifadələrlə gündəmə gəlmək istəyir”.


Üzeyir Cəfərovun sözlərinə görə, erməni tərəfi həmin günlərdə Azərbaycanın hücum etməsi və ya hücum niyyətində olması ilə bağlı sübut kimi heç bir fakt ortaya qoya bilməz:

“Balasanyan həmin günlər Azərbaycanın əlində olan arsenalın - hansısa təyyarənin, tankın və ya başqa hərbi texnikanın hücumu ilə bağlı hər hansı bir videogörüntü və ya başqa bir sübut ortaya qoya bilərsə, danışsın. Amma belə bir fakt yoxdur. Çünki Azərbaycan ordusu hücum etməyib”.

Hərbi ekspertin sözlərinə görə, Azərbaycanın ümumiyyətlə Xankəndiyə hücum etmək planı yoxdur: “Azərbaycan əgər hücuma başlayarsa, Xankəndiyə hücum etməyəcək. Bizim ordu ətrafdakı mövqeləri ələ keçirdikdən sonra Xankəndini mühasirəyə alacaq. Onda ordakı Ermənistan hərbçilərinin təslim olmaqdan başqa yolu qalmayacaq”.


Məsələ aydındır, Vitali Balansanyan blef edir. Əslində, Xocalı soyqırımında mülki azərbaycanlıları qıran Ermənistan ordusuna rəhbərlik edənlərdən biri olmuş Vitali Balasanyanın bütün həyatı blefdir. Əsgəranda orta məktəbi bitirdikdən sonra bir müddət Ağdamda futbol oynamış Balasanyan daha sonra Dağlıq Qarabağı Azərbaycandan qoparmaq məqsədi ilə yaradılmış “Qarabağ” komitəsinə qoşulub. Bundan sonra meyit alverinə qurşanıb və əməlli-başlı varlanıb. Bunun hesabına özü üçün əvvəlcə İrəvan koperativ texnikumunun diplomunu, sonra isə general-mayor rütbəsini satın alıb.

Vitali Balansanyanın növbəti blefi aprel döyüşləri ilə bağlıdır. Balasanyan yaxın dairələr iddia edir ki, həmin vaxt Madagiz polkunun komandiri Arutyun Amirxanyan Azərbaycan ordusunun hücumunu görərək postu qoyub qaçıb. Heç bir vəzifəsi olmayan Vitali Balasanyan, sən demə irəli çıxaraq Azərbaycan ordusunun hücumunu dayandırıb.

Dörd günlük müharibənin gedişini diqqətlə aradıqda görmək olur ki, belə bir şey olmayıb. Aprelin 2-də Ermənistan ordusu 20-yə yaxın tankla cəbhə xəttini yarıb Yevlax - Mingəçevir istiqamətində hücum təşkil etmişdi. Azərbaycan əks hücumla 15 yaxın erməni tankını məhv etdi və iki strateji yüksəkliyi ələ keçirdi.