"Yeni Azərbaycan" Prezidentin və Milli Məclis sədrinin iradəsinə qarşı çıxıb? - Foto

İqtisadçı millət vəkili Vahid Əhmədov haqqında "Yeni Azərbaycan” qəzetində dərc olunmuş "Vahid Əhmədovun görünən və görünməyən üzü” başlıqlı tənqidi məqalə cəmiyyətdə təbii ki, birmənalı qarşılanmayıb və bu yazının aşkar qərəzdən və sifarişdən qaynaqlandığı kimsədə şübhə doğurmayıb

Maraqlıdır ki, sədri prezident İlham Əliyev olan hakim partiyanın mətbu orqanı olan bu qəzetin həmin məqaləsindən bir ay əvvəl Vahid Əhmədovun 70 yaşı tamam olub və bu münasibətlə dövlət başçısı onu "Şöhrət" ordeni ilə təltif edib.

Eyni zamanda Milli Məclisin sədri Oqtay Əsədov Vahid Əhmədovu təbrik edərək barəsində çox yüksək fikirlər bildirib. Həmin fikirlər "Milli Məclis" jurnalının sonuncu sayında da əksini tapıb. Həmin dərin məzmunlu təbrik məktubunun bircə abzasını oxucuların diqqətinə ərz etməklə kifayətlənirik və mühakimə yürütməyi onların ixtiyarına buraxırıq:

"Görkəmli iqtisadçı, fəal ictimai xadim, baş verən proseslərə həmişə yüksək vətəndaşlıq mövqeyindən yanaşan ziyalı kimi Siz geniş ictimaiyyətin hörmətini qazanmısınız. Bu gün müstəqil Azərbaycanın 5 - ci çağırış parlamentinin deputatı, Milli Məclisin İqtisadi siyasət, sənaye və sahibkarlıq komitəsinin üzvü kimi təqdirəlayiq fəaliyyət göstərir, qanun yaradıcılığı işinə öz layiqli töhfənizi verirsiniz".

Dəyərli oxucu, prezident İlham Əliyevin verdiyi yüksək qiymətdən və Milli Məclis sədrinin bu cür xoş sözlərdən sonra Vahid Əhmədov haqqında belə bir məqalənin işıq üzü görməsinə Sizlər nə ad verirsiniz...? (moderator.az)