Azərbaycan postneft dövrünün başlanmasını elan edən ilk ölkələrdən biri oldu
Ulus.Az xəbər verir ki, Azərbaycan ixraca subsidiya təklif edən az sayda MDB ölkələrindən biridir.
Bu, o deməkdir ki, sahibkar ixrac etdiyi məhsulun növünə uyğun dövlət büdcəsindən subsidiya alır.
Bu zaman həmin vəsait sahibkarın hesabına köçürülür və sahibkar onu istifadə etməkdə sərbəstdir. Subsidiya əvəzsiz verilən, büdcəyə qaytarılmayan vəsaitdir.
Bu fonda da düşünmək olar ki, neft erası artıq başa çatıb. Bu baxımdan fərqli proqnozlar olduğundan postneft dövründə vacibdir ki, məhz qeyri-neft sektorunun inkişafı dəstəklənsin.
Ölkə iqtisadiyyatının dayanıqlılığı praktik olaraq qeyri-neft sektorunun inkişafından asılıdır. Ona görə də qeyri-neft sektorunun dəstəklənməsi ilə bağlı fəaliyyətlərin genişləndirilməsi olduqca vacibdir.
Bu baxımdan dövlət dəstəyinin artırılması qeyri-neft sektorunun mövqeyinin möhkəmlənməsinə gətirib çıxaracaq. İmkan verəcək ki, qeyri-neft sektoru üzrə ixracatın çəkisini artırmaq mümkün olsun.
Qeyri-neft sektorunun inkişafı nəticədə dayanıqlı iqtisadi inkişafı təmin edəcək, ölkəyə daha çox valyuta axını gələcək və iqtisadi şaxələndirmə ilə bağlı hədəflərə nail olunacaq.
Azərbaycan öz iqtisadi siyasətini yeni şəraitdə meydana çıxan çağırışlara uyğun qurub.
Məlumdur ki, hazırda qlobal miqyasda müşahidə edilən mənfi tendensiyalar fonunda milli dövlətlərin ərzaq və digər istehlak mallarına tələbatının təmin edilməsi böyük aktuallıq daşıyır.
BMT-nin Ərzaq və Kənd Təsərrüfatı Təşkilatının (FAO), digər beynəlxalq qurumların hesabatlarında dünya üzrə ərzağa tələbatın getdikcə artdığı bildirilir.
Azərbaycan da daxil olmaqla iqtisadiyyatı neft amili ilə bu və ya digər dərəcədə bağlı olan ölkələrin gəlirləri müəyyən qədər azalıb.
Belə şəraitdə neft daxilolmalarının azalmasını qeyri-neft iqtisadiyyatı üzrə ixracın artırılmasından qazanılan gəlirlər hesabına kompensasiya etmək mümkündür.
Ölkəmiz yeni şəraitdə həyata keçirdiyi iqtisadi siyasətdə bəhs olunan bu iki çağırışı əlaqələndirərək həm daxili tələbatın yerli istehsal hesabına ödənilməsinə nail olmağa, həm də qeyri-neft sektorunda yeni ixrac potensialı yaratmağa böyük səy göstərir.
Prezident İlham Əliyev vurğulayıb ki, fəaliyyətimizin əsas istiqamətləri daxili tələbatı daxili istehsal hesabına ödəməkdən və ixrac potensialımızı artırmaqdan ibarətdir. Biz bu yolla gedirik.