Azərbaycan NƏDƏN rus “AYI”sının qəzəbinə tuş gəlib? - Sensasion gizlinlər

Rusiya-Azərbaycan münasibətləri daim dostluq, mehriban qonşuluq əlaqələri çərçivəsində inkişaf edib. Bu baxımdan ÜAK-ın ləğvi qərarının qəbul edilməsi təəssüf doğurur.

Rusiya Ali Məhkəməsi tərəfindən belə bir qərarın qəbul edilməsi erməni lobbisinə olan diqqətin göstəricisidir və qərarın erməni lobbisinin təsiri altında verildiyini nümayiş etdirir.

Rusiyada yüz minlərlə azərbaycanlı yaşayır, onlar bu ölkədə seçmək və seçilmək hüququna malikdirlər və bu ölkənin ictimai-siyasi həyatında fəal iştirak edirlər. Bu qərarın qəbulu onların fəaliyyətinə də kölgə sala bilər.

Azərbaycan öz geostrateji mövqeyi ilə Cənubi Qafqazda Rusiyanın çox vacib tərəfdaşıdır, bu tərəfdaşlıq iqtisadi, siyasi, hərbi, sosial sferaları əhatə edir.

Azərbaycan dövləti həmişə Rusiyanın regiondakı strateji maraqlarını nəzərə alıb, beynəlxalq təşkilatlar çərçivəsində faydalı əməkdaşlıq əlaqələrini inkişaf etdirib və münasibətlərdə qarşılıqlı dəstək ruhu hökm sürüb.

Rusiyanın bəzi anti-Azərbaycan dairələri, dövlət orqanlarındakı ermənipərəst şəxslər, habelə bu ölkədəki erməni lobbisi Azərbaycan xalqına və dövlətinə qarşı təxribatçı fəaliyyətini davam etdirirlər.

Son zamanlar Rusiyanın ədliyyə sisteminə yerləşmiş ermənipərəst şəxslərin fəaliyyəti daha qabarıq şəkildə özünü büruzə verir.

Azərbaycanda yaşayan ruslar bu ölkədə rus mədəniyyətinə, dəyərlərinə və dilinə göstərilən hörməti yüksək qiymətləndirirlər.

Ancaq hakimiyyət rus “ayı”sının qəzəbinə tuş gəlib. Ümumrusiya Azərbaycanlılarının Konqresi (ÜAK) “canlı ölü” kimi bir təsisat idi və işlək deyildi.

Olsun! Deyək ki, həqiqətən də sözügedən təşkilat fəaliyyətsiz və müqəvva idi, azərbaycanlıların diaspora fəaliyyətində nəzərəçarpan bir iş görmürdü.

Onda heç nə yaramayan, varlığı ilə yoxluğu bilinməyən qurumun ləğvi dünyaya meydan oxuyan, Suriyadan Ukraynaya qədər ləpirləri görünən “ayı”nın nəyinə lazım idi?!

Təbii ki, belə bir qarışıq vaxtda Kremldən gələn solaxay zərbənin təsiri ikiqat ağır effekt verməkdədir. Bu şillənin təsiri duş effektinə bənzərdir.

Rəsmi Bakı arxadan bıçaq saplanacağını gözləmirdi. Moskva isə tələm-tələsik hakimiyyəti cəzalandırdı. Niyə, nə üçün? Çünki Kreml Rusiyadan yan keçən TAP, TANAP, Bakı-Tiflis-Qars layihələrindən narazıdır.

Düzdür, rəsmi Bakı bu qədər dərinə getməyəcək. Hakimiyyət yaxşı bilir ki, rus “ayısı ilə zarafat eləmək olmaz və spekulyativ siyasət baha başa otura bilər. Və onu da gözəl anlayırlar ki, “Moskva göz yaşlarına inanmır”.

Putin isə o siyasətçidir ki, tarixdə Türkiyə dövlətinin Ərdoğan başda olmaqla pilotun vurulmasına görə Rusiyadan üzr istəməsinə nail olub. İndi dəli beyinli rus hakimiyyətini üstümüzə qaldırmaq ağır fəsadlar verə bilər.

Azərbaycan hakimiyyəti bir müddət yaranacaq soyuqluqdan sonra Rusiya ilə münasibətləri yenidən formasına salacaq. Rəsmi Bakının artıq Moskva ilə siyasətdə böyük təcrübəsi var.

Ulus.Az